Aqtóbede aýyl sharýashylyǵy qyzmetkerleriniń kúni ótti

Egin oryp, qysqy mal azyǵyn jınap alǵan sharýalar búgin jyldy qorytyndylady. Bıyl óńirde 170-ten astam aýyl sharýashylyǵy kooperatıvi qurylyp, jumys birqalypty júrip jatyr. Aýyl sharýashylyǵy maqsatyndaǵy jer telimderi tekserilip, 365 myń gektar jer aýyl sharýashylyǵy aınalymyna qaıta berildi. Óńirde sýarmaly jerdiń aýmaǵy keńeıip, 21,5 myń gektarǵa jetti. Eýropalyq qaıta qurý jáne damý banki óńirdegi sýarmaly jer telimderin qalpyna keltirý jumystaryn júrgizýge kómek berip jatyr. Jospar boıynsha 2020 jyly sýarmaly jer kólemi 40 myń gektarǵa jetedi. Sonymen qatar, dástúrli emes sala damyp keledi.

 

«Úsh jyldan beri qoıan baǵyp, etin satyp júrmiz. Aqtóbe qalasy mańyndaǵy aýylda óz sharýashylyǵymyz bar. Qazir 400-500qoıan baǵyp otyrmyz. Aıyna 100-120 qoıan soıyp, satamyz. Alǵashqy jyldary suranys az boldy. Buryn qoıan aýlap, etin jegen adamdar sharýashylyqqa keledi. Saýda oryndaryna qoıan eti shyǵarylǵan soń suranys artty»,- dedi «Jańaqonys» ShQ jumysshysy Aman Qaıyrov. Sharýa qojalyǵynyń jumysshylary shóp, sý berip, qoıannyń arnaıy jemin beredi. Reseıden ákelingen qoıandar sýyqqa tózimdi keledi. Al «Shekshek ata» aýyl sharýashylyǵy kooperatıvi eshki baǵady. Sharýashylyqta nýbııalyq, pákistandyq teke bar. Al eshkiler Reseıden ákelingen. Eshkiler sútti, kúnine 5-6 lıtr sút beredi.

«Jyly jaqtan jetkizilgen teke men eshki salqynǵa shydaı almaıdy. Sondyqtan olarǵa arnalǵan qora ishinde arnaıy jylý júıesi júrgizilgen. Sútin satamyz, sútinen qymyz daıyndalady. Sút zaýytynda óńdeý jumystary júrgizilip, 50-60 lıtr sút saýda oryndaryna jetkizilip jatyr. Suranys joǵary»,- dedi «Shekshek ata» aýyl sharýashylyǵy kooperatıviniń basqarýshysy Meırambek Orazov.

 

Eshki sharýashylyǵyn qolǵa alǵan kásipker Reseıdiń tájirıbesine súıendi. Sheberlik sabaǵyna qatysyp, eshki baǵýdyń qyr-syryn úırendi.

«Eshki sútinen qymyz jasaý tehnologııasy tek Aqtóbe qalasynda qolǵa alyndy. Eshki qymyzy Qazaqstanda joq. Tehnologııasy qarapaıym. Quramynda eshki súti, qymyzǵa qosatyn ashytqy, sý bar. Keıin ashytylady. Bul asqazan aýrýyna paıdaly, ımmýnıtetti kóteredi. Aldaǵy ýaqytta shıpajaı ashý jospary bar. Elimizdiń ár óńirinde ótetin jármeńkelerge qatysyp júrmiz», - dedi kooperatıvtiń basqarýshy dırektory Nurbek Qudaıbergenuly.

Aıta keteıik, aýyl sharýashylyǵy qyzmetkerlerin Aqtóbe oblysynyń ákimi Berdibek Saparbaev quttyqtap, olarǵa alǵys hat tabys etti. Sonymen qatar, búgin 13 kıiz úı tigilip, at jarys ótkizildi. Oral qalasynan kelgen shabandoz Búrkit Eralys birinshi oryn aldy.