Aqtóbede aýyl mańyndaǵy órtti sóndirýge poıyzdyń kómegi qajet boldy
AQTÓBE. QazAqparat - Aqtóbede Shubarqudyq aýylynyń mańy men temirjol boıyndaǵy qurǵaq shóp órtendi. Órtti sóndirýge arnaıy mamandar men poıyz jiberildi, dep habarlaıdy QazAqparat tilshisi.
Aqtóbede kún qatty ysyp, aýyl mańynan órt shyqty. Órt sóndirýshiler túni boıy qyzyl jalyndy óshirdi.
«Temir aýdany, Shubarqudyq aýylynan 12 shaqyrym qashyqtyqta, Aqtóbe-Atyraý temir joly jáne orman kóshetteri boıyndaǵy qurǵaq shóp jandy. №13 órt sóndirý bóliminiń jeke quramynan 6 adam, 1 avtokólik, Shubarqudyq aýyldyq okrýginiń eriktilerinen 24 adam, 5 avtokólik, Aqsaıdan 7 adam, 1 tehnıka, Keńestýdan 10 adam, 2 tehnıka, Shubarqudyq stantsııasynan 1 órt sóndirý poıyzy jáne 14 adam jiberildi. Búgin saǵat 02:55-te órt sóndirildi. Barlyǵy aýdan ákimdiginiń baqylaýynda»,- dep habarlady oblystyq TJD baspasóz qyzmeti.
