Aqtóbede aýyl mańynan artıllerııa snarıady tabyldy
AQTÓBE. QazAqparat – Aqtóbe oblysynyń Hromtaý aýdanyndaǵy Tassaı aýyly mańynan artıllerııa snarıady tabylyp, joıyldy, dep habarlaıdy QazAqparat tilshisi.
Tassaı aýylynyń turǵyny Hromtaý aýdanynyń polıtsııa bólimine habarlasyp, jaqyn jerden artıllerııa snarıadyna uqsas tot basqan metall zat tabylǵanyn aıtty. Aýyl turǵyny ony óziniń úıiniń aýlasyna súırep aparǵan.
«Polıtsııa qyzmetkerleri artıllerııa snarıadyn tárkilep, joıdy. Atalǵan fakti boıynsha Qylmystyq kodekstiń «Qarýdy, oq-dárilerdi zańsyz ótkizý, saqtaý, tasymaldaý nemese alyp júrý» baby boıynsha tergeý áreketteri júrgizilip jatyr. Aqtóbe oblysynyń polıtsııa departamenti turǵyndarǵa mundaı «qyzyqty» zattar óte qaýipti bolýy múmkin ekenin eskertedi. Kóterý, tasymaldaý, olardy bólshekteýge tyrysýǵa bolmaıdy. Tabylǵan zattar týraly dereý polıtsııaǵa habarlaý kerek», - dedi oblystyq PD baspasóz qyzmetiniń jetekshisi Erbolat Sarqulov.
