Aqtóbede aýyl dúkenderindegi baǵa tekserildi
Sybaılas jemqorlyqqa qarsy qyzmet departamenti janyndaǵy arnaıy monıtorıng tobynyń ókilderi áleýmettik mańyzy bar azyq-túliktiń baǵasyn baqylap júr. Monıtorıng barysynda belsendiler Aqtóbe qalasy mańyndaǵy Aqshat, Aqjar, Qyzyljar aýyldary jáne Nur - Aqtóbe shaǵyn aýdanyndaǵy dúkenderdi aralady. Satýshylar jáne satyp alýshylarmen áńgimelesý barysynda azyq-túliktiń birneshe túrine shekti baǵa bekitilgeni týraly málimetti kóbi bilmeıtini anyqtaldy. Keıbirinde áleýmettik mańyzy bar taýarlardyń bekitilgen baǵasy saqtalmaǵan.
«Tótenshe jaǵdaıda árqaısymyzdyń ádeptiligimiz ben adaldyǵymyz erekshe mańyzǵa ıe», - dep atap ótti arnaıy monıtorıng tobynyń basshysy Táttigúl Talaeva.
Monıtorıng toby jergilikti ákimdikke naqty usynymdar berip, aldaǵy ýaqytta olardyń oryndalýyn baqylaıdy.
Aıta keteıik, Aqtóbe qalalyq ýchaskelik polıtsııa ınspektorlary iri dúken, sýpermarket qyzmetkerleriniń karantın talaptaryn qalaı saqtap júrgenin tekserdi. Іri gıpermarketterdiń birinde dezınfektsııalyq týnnel ornatylǵan. Satyp alýshylardyń barlyǵy sol arqyly ótip júr. Onymen birge gıpermarket qyzmetkerleriniń biri kelýshilerdiń qolyna antıseptık shashyp, taǵy bir qyzmetker satyp alýshylardyń qyzýyn tekseredi.
Polıtsııa qyzmetkerleri profılaktıkalyq aldyn alý jumystaryn jáne kezekte turǵandarǵa araqashyqtyń 1,5-2 metr bolýy qajet ekenin eskertti. Qala dúkenderinde karantın talaptarynyń saqtalýyn tekserý jumystary jalǵasady.
