Aqtóbede aýyl ákimi sý ortasynda qalǵan úıge eki kólik kúl jetkizip berdi
AQTÓBE. QazAqparat - Aqtóbe oblysy, Áıteke bı aýdany, Áıke aýylyndaǵy turǵyn úılerdi sý basty, dep habarlaıdy QazAqparat tilshisi.
Aqtóbe oblysy, Áıteke bı aýdany, Áıke aýylyndaǵy úsh úı sý ortasynda tur. Aýyl turǵyndary 16 sáýir kúni túski mezgilde sý astynda qalǵan úılerge kómek kórsetti. Qum men kúl tósep, úılerdi qorshaǵanymen, sýdyń aǵyny áli basylar emes.
«Biz qazir dalada júrmiz. Kúl tósep, jan baǵyp otyrmyz. Úıimizdiń jan-jaǵy sý. Tek úıge kirgizbeýdiń amalyn jasap, inim ekeýmiz jan-jaqty qorshap, sý júrer joldy bekitip álekpiz. Aýyl ákimi keldi, qarady. Ol «sýdyń deńgeıi tómendep kele jatyr» deıdi. Biraq bári sol baıaǵy qalpy. Ólshep otyrmyn, kóterilip keledi»,- dedi aýyl turǵyny Almas Kerqabaqov. Onyń aıtýynsha, aýylǵa sý Tereńsaı aýylynan kelip jatyr eken. «Bizge tótenshe jaǵdaı týraly aldyn-ala habar bergen joq. Úsh úı sý ortasynda tur. Tótenshe jaǵdaı qyzmetiniń telefon nómirin bilmeımiz. Olardy qaıdan shaqyrý kerek ekenin de aıtpady. Al aýyl ákimi esik aldyna eki kólik kúl tógip berdi. Ózge kómek joq»,- dedi Almas Kerqabaqov.
Aıta keteıik, Áıteke bı aýylynyń Áıke aýylynda sý tasqyny 90-jyldardyń ortasynda bolǵan. Aýyl ákimi Nurlan Álipbaev aýyldaǵy ahýaldy aıtýdan bas tartty. Qazirgi kezde aýylǵa kirer joldy da sý basyp jatyr.
