Aqtóbede aýyl ákimi saılaýyna qatysatyn baıqaýshylar biliktiligin arttyryp jatyr

AQTÓBE. QazAqparat - Aqtóbede qazir 181 baıqaýshy biliktiligin arttyryp jatyr. Olar aýyl ákiminiń saılaýyn baqylaıdy, dep habarlaıdy QazAqparat tilshisi.

Aqtóbe oblysy boıynsha 35 aýyldyń ákimi saılanady. Al saılaý barlyǵy 74 ýchaskede ótedi. Qazirgi kezde saıası naýqanǵa qatysatyn baıqaýshylar daıyndalyp jatyr. Olardyń kóbi saılaý ótetin aýyl turǵyny.

«Partııalyq emes baqylaý ortalyǵy» saılaýdy baqylaıdy jáne saılaý protsesine monıtorıng júrgizedi. Elimizdiń barlyq óńirinde fılıaly bar jáne saılaý kezeńinde saıası, ekonomıkalyq, áleýmettik jáne mádenı quqyq pen bostandyqty iske asyrady. Bizdiń qoǵamdyq uıym óziniń aldyna eldegi saılaý protsesiniń zańdylyǵy men ashyqtyǵyn qamtamasyz etýdi maqsat etip qoıdy. Qazirgi ýaqytta ortalyq baıqaýshylardy oqytyp jatyr. Fılıal búginde 181 baıqaýshyny qabyldap, biliktiligin arttyrýdy bastady»,- dedi oblystyq shtabtyń jetekshisi jáne «Partııalyq emes baqylaý ortalyǵy» respýblıkalyq qoǵamdyq birlestigi Aqtóbe oblystyq fılıalynyń basshysy Erádil Ýbbınııazov.
Aıtyp óteıik, baıqaýshylarymyzdyń tizimine bıyl Parlament Májilisi men máslıhat saılaýyna qatysqan tájirıbesi bar túrli qoǵamdyq uıymdardyń ókilderi kirdi.
«Aýyl ákimderiniń tikeleı saılaýy - saıası jańǵyrýdyń jańa kezeńin bildiretin óte mańyzdy oqıǵa. Mundaı daýys berý elimizde alǵash ret ótkizilip otyr. Saılaý protsesiniń zańdylyǵy men ashyqtyǵyn baqylaý úshin bizde saılaýdy baqylaý salasynda úlken tájirıbesi bar komanda quryldy. Ortaq kúsh-jigerimizben Aqtóbe oblysynda ashyq jáne táýelsiz saılaý ótkizýge eleýli úles qosamyz dep sanaımyn»,- dedi Erádil Ýbbınııazov.
Baıqaýshylar qatarynda Aqtóbe oblysynyń úkimettik emes uıym qaýysdastyǵy, Tutynýshylardyń quqyǵyn qorǵaý keńesi, Aqtóbe oblysynyń medıatorlar keńesi, «Aýla klýby» qoǵamdyq birlestigi jáne «Partııalyq emes baqylaý ortalyǵy» respýblıkalyq qoǵamdyq birlestigi Aqtóbe oblystyq fılıalynyń músheleri bar.