Aqtóbede aýyl ákimi inisine sýbsıdııa alyp berip, jumysynan ketti
AQTÓBE. QazAqparat - Aqtóbe oblysy, Baıǵanın aýdany, Qaraýylkeldi aýylynyń ákimi Ernazar Qalıev sýbsıdııa berý kezinde inisine kómektesti, dep habarlaıdy QazAqparat tilshisi.
Aqtóbede sýbsıdııa berýde kemshilikter jıi tirkele bastady. Buǵan deıin habarlaǵanymyzdaı , Aqtóbe oblystyq máslıhatynyń depýtaty Baqytjan Erjanov alaıaqtyq jolmen memlekettik sýbsıdııany aldy degen kúdikpen qamaýǵa alyndy. QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblystyq departamenti basshysy Qaıyrjan Toqyshevtiń aıtýynsha, sýbsıdııa beretin komıssııa músheleriniń arasynda iri kólemde sýbsıdııa alyp otyrǵan sharýashylyq basshylary bar jáne bul múddeler qaqtyǵysy dep esepteletinin jetkizdi.
«Іri aýyl sharýashylyǵy ujymyn basqaratyn, qomaqty sýbsıdııa alatyn adamdar komıssııa quramynda bolmaýy tıis. Ádep keńesi men prokýratýra birigip, tekserý júrgizdi. Nátıjesinde 10-nan astam sharýashylyqqa sýbsıdııa durys berilmegeni týraly derek anyqtalyp, tártiptik jazaǵa tartyldy. Baıǵanın aýdany, Qaraýylkeldi aýylynyń ákimi qyzmetinen ketti. Halyq aryz jazdy. Tekserý kezinde tabynǵa 10 atalyq mal, ıaǵnı, buqa qosyldy dep kórsetilgen, shyn máninde 7 atalyq maldyń bolǵany anyqtady. Sharýashylyq ıesi 10 atalyqqa sýbsıdııa alyp otyrǵan. Qazirgi kezde sýbsıdııaǵa berilgen qarjy qaıtarylyp, ákimniń ózi qyzmetinen ketti»,- dedi Qaıyrjan Toqyshev.
Aqtóbe oblystyq aýyl sharýashylyǵy basqarmasy sýbsıdııa berý jumysyn elektrondy túrde ótkizetin boldy. Basqarmasy basshysynyń orynbasary Asylhan Ábdıevtiń aıtýynsha, sýbsıdııa berý kezinde arnaıy ereje jasalyp, bekitildi.
