Aqtóbede aýyl ákimdigi turǵyndarmen birge Amal merekesin atap ótti
AQTÓBE. QazAqparat -Aqtóbe qalasy, Qarǵaly aýyldyq okrýginiń ákimdigi búgin turǵyndarǵa arnap kıiz úı tigip, Naýryz kóje asty. Buǵan deıin tek kabınette kezdesip, resmı tildesken ákimdik qyzmetkerleri aýyl adamdarymen tós túıistirip, bir-birinen keshirim surady, dep habarlady QazAqparat tilshisi.
Aqtóbe qalasyndaǵy «Geolog» mádenıet úıinde Amal merekesi ótti. Qarǵaly selolyq okrýginiń turǵyndary úshin arnaıy kıiz úı tigilip, dastarqan jaıyldy.
«Biz bala kezimizde jyl basyn 14 naýryzda qarsy alatyn edik. Sol kúni aýyldyń úlkenderine baryp, kórisemiz. Olar dastarqan jaıyp, Naýryz kóje usynady. Bıyl ata dástúrimizdi qaıta jańǵyrtyp, mádenıet úıiniń janyna kıiz úı tigildi. Mádenıet úıiniń qyzmetkerleri óner kórsetip, Ájeler ansambli án saldy. Osy jolmen salt-dástúrimizdi nasıhattap, aýyl turǵyndaryna ulttyq taǵamdardy usyndyq»,- dedi «Geolog» mádenıet úıiniń dırektory Saǵyntaı Qalıev.
Aýyl ákimdigi men mádenıet salasynyń qyzmetkerleriniń tosyn syıyn halyq óte jaqsy qabyldady. Aqsaqaldar bata berip, eldiń birlik-tatýlyǵyn tiledi.
«Bul kúni jasy úlkenderge baryp, amandyǵyn bilip, jyldan aman-esen shyqqanymyz úshin táýbe aıtatyn kún. Ári tatýlyqqa shaqyrady. Ákimdik pen mádenıet salasynyń qyzmetkerleri shaqyrǵan soń kelip, ulttyq dástúrimizdi jańǵyrtýǵa úles qosyp júrmiz. Biz úshin dastarqan jaıyldy. Dástúrmen Naýryz kóje berildi. Ulttyq bolmysymyzdy osy arqyly nasıhattap, jetkize bilsek, mura etip qaldyrsaq, biz úshin bul da bir baqyt»,- dedi Aqtóbe qalasynyń turǵyny Aqbala Nurlaeva.
Aqtóbe qalasynyń Qarǵaly aýyldyq okrýginde 20 myńnan astam adam turady. Aýyl turǵyndary mektep, balabaqshamen qamtamasyz etilgen.
«Biz úshin aýyl turǵyndarynyń ár kúni mańyzdy. Búgin dástúrimiz boıynsha olardy shaqyryp, kontserttik baǵdarlamamyzdy usyndyq. Aýyl halqy men ákimdik qyzmetkerleri kabınette emes, dastarqan basynda kezdesip, tós túıistirdi. Qystan aman shyǵyp, jańa jyldy qarsy alǵan turǵyndar aldynda ókpe-renish bolsa, keshirim suradyq. Bári kóńildi, óz alǵystaryn jetkizip jatyr»,- dedi aýyldyq okrýg ákiminiń orynbasary Gúlsim Omarova.
Aıta keteıik, Aqtóbe qalasynda búgin «Baýyrsaq» merekesi ótkiziledi. Naýryz merekesine arnalǵan shara kezinde jastar flesh-mob uıymdastyryp, ulttyq taǵamdar usynylady. Al óner ujymdary kontsert qoıady.
