Aqtóbede aýtızmge shaldyqqan balalarǵa arnalǵan emdeý ortalyǵy salynady
AQTÓBE. QazAqparat - Aqtóbe oblysynda aýtızm dertine shaldyqqan balalarǵa arnap ońaltý ortalyǵy salynady. Sonymen qatar, ıppoterapııamen emdeý jáne múgedekterdi ońaltý ortalyǵy boı kóteredi, dep habarlaıdy QazAqparat tilshisi.
Aqtóbede múgedekter kúnine arnalǵan «Ashyq álem» konferentsııasy ótti. Aýdan, aýyldaǵy múmkindigi shekteýli jandar, olarǵa qamqorlyq kórsetip júrgen adamdar óz usynystaryn jetkizip, aldaǵy josparlarymen bólisti.
Aqtóbe oblystyq jumyspen qamtý jáne áleýmettik baǵdarlamalar basqarmasynyń bólim basshysy Raısa Sırajeddınovanyń aıtýynsha, sońǵy jyldary múgedekterge qajetti zattardy alý úshin bıýdjetten eki ese kóp qarjy bólindi. Aqtóbede 2013 jyldan bastap úkimettik emes uıymdar múgedekterge kómek kórsetip keledi. Múgedek balalar da qaraýsyz qalmaıdy. Máselen, 2013 jyly 179 balaǵa qamqorlyq kórsetildi, al bıyl olardyń sany 303-ke jetti. Ári áleýmettik kómek alatyndar óz tańdaýyn jasaı alady. Aqtóbe qalasynda ınvetaksı qyzmeti 2005 jyldan bastap qyzmet kórsetip keledi. 2012 jyldan beri ınvetaksıge qazynadan qarjy bólinip otyr. Tek oblys ortalyǵynda emes, Mártók aýdanynda múgedekterdi arnaıy taksı qyzmeti tasymaldaıdy. Aldaǵy ýaqytta Alǵa, Muǵaljar aýdandarynda ashylady. Ippoterapııaǵa suranys joǵary. Bıyl 120 bala osy qyzmetti paıdalandy.
«Óńirde sal aýrýyna shaldyqqan 500-ge jýyq bala bar. Aqtóbede ıppoterapııa ortalyǵy salynady. Jańa ortalyq iske qosylsa barlyq bala ıppoterapııa ortalyǵymen qamtylady. Aqtóbe oblysy, Hromtaý aýdanyndaǵy «Rýsskaıa mednaıa kompanııa» JShS-men arada kelisim bar. Aldaǵy ýaqytta memlekettik-jeke menshik seriktestik aıasynda múgedekterdi ońaltý ortalyǵy boı kóteredi. Aýyldan kelgen azamattar sol ortalyqta jatyp em qabyldaı alady. Al qala turǵyndary emin qabyldap, úıine qaıta orala alady. Múgedekterge qajetti ortalyqtar tek oblys ortalyǵynda emes, aýdandarda da salynýy kerek. Biz olarǵa jaǵdaı jasaýymyz kerek. Densaýlyǵyn nyǵaıtý, oqytý, jumysqa ornalastyrý máseleleri únemi nazarymyzda bolady»,- dedi oblys ákimi Berdibek Saparbaev.
Óńir basshysy bılik, qoǵam, azamattar birikse, turǵyndardyń jaǵdaıy jaqsara túsetinin atap ótti.
«Aýrýmyn dep úıde otyrýǵa, jatýǵa bolmaıdy. Adam ómirge kelgen soń áreket jasaýy kerek. Adam úshin eń qymbaty, qyzyqtysy, qajeti ómir. Memleket qoldaýy kerek, qoldaıdy. Aýtızm týraly bilemin. Kásipkerdiń kómegimen aýtızmge shaldyqqan balalardy emdeý ortalyǵy salynady»,- dedi B.Saparbaev.
Konferentsııa kezinde besinshi respýblıkalyq spartakıada kezinde jeńiske jetken múgedek sportshylar marapattaldy. Olarǵa syılyq berildi.
«Bizdiń aramyzda úzdik eńbekkerler, sportshylar, erekshe tulǵalar bar. Olardyń bári óz-ózin damytyp otyr. Táýelsiz ómir súrý degenimiz osy. Biraq múgedekter arasynda óz jaǵdaıyn jasaı almaıtyn adamdar bar ekeni anyq. Olar qamqorlyqqa muqtaj. Qarttar men múgedekter úıinde, jetim balalar úıinde turatyn adamdar, jumyssyz júrgender. Mine, osy erekshe jaǵdaıdaǵy adamdar jaltaq bolmaýy tıis»,- dedi Gúlmıram Srajova. Statıstıkaǵa súıensek, Aqtóbede 24 myńnan astam múgedek bar. Onyń 3 myńy bala.
