Aqtóbede aýrýhanaǵa aman túsken sábı sal bolyp qaldy
AQTÓBE. QazAqparat - Aqtóbede 8 aılyq Syrǵalym Ótep qusyp, dene qyzýy kóterilip Aqtóbe oblystyq klınıkalyq ınfektsııalyq aýrahanasynda em qabyldady. Óz erkimen basyn kóterip, kúlip-oınap júrgen bala sal bolyp qaldy, dep habarlaıdy QazAqparat tilshisi.
Aqtóbe qalasyndaǵy saıajaılardyń birinde turǵan Aıymgúl Ermahanova qazir qyzy Syrǵalym Óteppen Aqtóbe qalalyq balalar aýrýhanasynda em qabyldap jatyr. Ol osy jyldyń aqpan aıynda ómirgen kelgen qyzy Syrǵalymmen birge mamyr aıynan bastap aýrýhana jaǵalap júr. Arada 5 aı ótkende sábıdiń kózi kórmeı, óz erkimen qımyldaı almaı qalǵan.
«Qyzym qusyp, jedel járdemmen Aqtóbe oblystyq klınıkalyq ınfektsııalyq aýrýhanasyna tústik. Keıin aıran iship, taǵy em qabyldadyq. Barlyǵy 4 ret aýrýhanaǵa jattym. Sol kezde qyzymnyń julynynan sý alýǵa ruqsat surap, men kelisimimdi berdim. Taǵy bir ret usynys jasaǵan kezde bul óte qaýipti ekenin bilip, kelisimimdi bermedim. Qoryqtym, aýrýhanaǵa qolhat jazyp, shyǵyp kettim. Taǵy aýyryp, qusyp, jedel járdemmen túsken kezde qyzym jansaqtaý bóliminde jatty. Kózi kórip, qımyldap, oınaǵan balam qazir selsoq jatyr. Tek emedi, suıyq tamaq ishedi. Kúlkisin, bizge qarap máz bolǵan júzin saǵynyp qaldyq»,- dedi Aıymgúl Ermahanova.
Aqtóbe oblystyq klınıkalyq ınfektsııalyq aýrýhanasynda em qabyldaǵan bala Aqtóbe qalalyq balalar aýrýhanasyna jiberildi. Bul jerde ońaltý sharalary júrgizilip jatyr. Dárigerler túrli dárýmender berip, massaj jasaıdy. Mundaı em úzdiksiz júrgizilýi tıis. Sal bolyp qalǵan balany qaıta qalpyna keltirý úshin uzaq ýaqyt pen shydam kerek.
«Naýqas bizge ınfektsııalyq aýrýhanadan keldi. Nevrologııa bólimine jatqyzyp, ońaltý sharalary qolǵa alyndy. Neıroınfektsııa bar, ıaǵnı, mıyna qan quıyldy. Jaǵdaıy ortasha aýyr dep baǵalanýda. Bala uzaq ýaqyt ońaltý em-sharasyn qabyldaýy tıis. Bir aıdan asty bala burynǵy qalpyna kelgen joq. Qazir em tolyq jasaldy. Sál artyqshylyqtar bar. Ol qolyn qımyldata bastady»,- Aqtóbe qalalyq balalar aýrýhanasynyń bas dárigeri Natalıa Golovyrına.
Dáriger emhanaǵa tirkeýge alynyp, emdi úzdiksiz júrgizýge, portalǵa tirkelip, ońaltý sharalaryn ótkizýge baǵyttady. Al Aqtóbe oblystyq klınıkalyq ınfektsııalyq aýrýhanasy balanyń 4 ret túskenin, anasy Aıymgúl Ermahanova eki ret qolhat qaldyryp, ketip qalǵanyn málimdedi. Tipti áleýmettik jeli arqyly kómek surap, dárigerlerdiń is-áreketine kúmándaǵan otbasyn sotqa berýge shaǵym jazyp jatyr. Aýrýhana osy jolmen óz sheshimderiniń durys ekenin, em nátıjeli bolǵanyn habarlady.
«Anasy júkti bolǵan kezde balasyna ınfektsııa juqtyrǵan. Bala sol ınfektsııamen ómirge kelgen. Bala ekinshi ret aýrýhanaǵa túsken kezde osy dıagnoz qoıyldy. Em qabyldady. Nevropatolog qarap, balanyń damýy tejelgen dep tujyrym jasaldy. Syrǵalym Ótep túsken kezde dárigerler bar kúshin salyp, joǵary bilikti mamandar qaraýyna aldy. Asa muqııat tekserilip, es-tússiz jatqan balany qaıta ómirge ákelý úshin qymbat dárige tapsyrys bergen edik. Immýnnoglobýlındi bergen soń bala esin jıdy. Ol es-tússiz tústi, emdeldi, esin jıdy», - dedi Aqtóbe oblystyq klınıkalyq ınfektsııalyq aýrýhanasy bas dárigeriniń Maıra Nurǵalıeva. Dárigerdiń aıtýynsha, balanyń denesi qurysyp, birden jansaqtaý bólimine jatqyzylǵan.
Al Syrǵalymnyń anasy jylap, mazasy qashqan balaǵa ekpe jasalǵan soń ol esinen aıyrylǵanyn aıtyp otyr. Qazir ata-ana balaǵa bar emdi jasap, qaıta qalpyna keltirý sharalaryn júrgizip berýdi talap etýde. Al ar-ojdanymyzǵa nuqsan keltirdi degen aq halattylar aryzdy polıtsııaǵa berip, qylmystyq is qozǵatýdy talap etpek. Tipti 2 myń AEK kóleminde aıyppul salyp, 4,5 mıllılon teńge moraldyq-materıaldyq shyǵyn ótep alýdy josparlap otyr.
