Aqtóbede aýmaǵy úsh gektar bolatyn jylyjaı sharýashylyǵy nelikten bankrot boldy
AQTÓBE. KAZINFORM – Jylyjaıdyń ınfraqurylymy tozǵan. Al ony jańartýǵa ınvestıtsııa tabylmady. Kazinform saýalyna Aqtóbe oblystyq aýyl sharýashylyǵy basqarmasy jaýap berdi.
«Aqtóbe-Jylyjaı» JShS-i 2012 jyly qurylǵan kompanııa. 2014 jyly aýdany 3 gektar bolýy tıis jylyjaıdyń 1,5 gektary ǵana qoldanysqa berildi. Sol kezde «QazAgroQarjy» AQ-y Indýstrıaldy-ınnovatsııalyq damý baǵdarlamasy aıasynda qoldaý kórsetken. Baǵasy tómen gaz jylyjaı jumysyna oń áserin tıgizýi tıis bolǵanymen, arada on jyl ótkende kompanııa jumysyn toqtatty.
– Jylyjaı qyzmetiniń toqtaýyna kásiporynnyń qarjylyq jaǵdaıynyń nasharlaýy, óndiristik ınfraqurylymnyń tozýy jáne jylyjaı keshenin tolyqqandy paıdalanýǵa qajetti ınvestıtsııanyń jetkiliksizdigi sııaqty birqatar ekonomıkalyq jáne óndiristik faktorlar áser etken. Nátıjesinde kásiporyn bankrotqa ushyrap, jylyjaı kesheni uzaq ýaqyt boıy paıdalanylmady, - dep habarlady Aqtóbe oblystyq Aýyl sharýashylyǵy basqarmasy.
Bankrot bolǵan jylyjaı endi «Aktobe Greenhouse Complex» JShS-niń ınvestıtsııalyq jobasyna aınaldy. Aýdany 3 gektar bolatyn jylyjaı keshenin qaıta jańǵyrtý jumystary da qolǵa alynǵan.
- Birinshi kezeń boıynsha 1,5 gektar aýmaqta rekonstrýktsııalaý jumystary aıaqtalyp keledi. Aldaǵy ýaqytta qalǵan bóligin kezeń-kezeńimen qalpyna keltirý jáne óndiristik qýatty iske qosý josparlanyp otyr, - dep jazdy Aqtóbe oblystyq Aýyl sharýashylyǵy basqarmasy.
Eske salsaq, 2022 jyly «QazAgroQarjy» AQ «Aqtóbe-Jylyjaı» JShS-in sotqa berdi. Sol kezde kompanııanyń qaryzy 2 mlrd teńgeden asyp ketken.
Jalpy Aqtóbe oblysynda aýdany 47 gektar bolatyn 40 jylyjaı sharýashylyǵy bar. Aqtóbe oblystyq Aýyl sharýashylyǵy basqamasynyń habarlaýynsha, úsheýi ónerkásiptik úlgidegi, on besi fermerlik úlgide, qalǵany jeke qosalqy sharýashylyqtarda. Byltyr Aqtóbe oblysy boıynsha jylyjaılarda 17,6 myń tonna qyzanaq jáne qııar óndirildi.
