Aqtóbede aýla sypyrýshy kásipker bolyp ketti
AQTÓBE. QazAqparat – Aqtóbelikter «Bastaý» jobasymen dástúrli emes sharýashylyqty meńgerip jatyr, dep habarlaıdy QazAqparat tilshisi.
«Atameken» UKK-nyń Qobda aýdandyq fılıaly 42 jastaǵy Aleksandr Krasılnıkovtiń bıznes bastaýyna kómektesti. Aýyl turǵyny aldymen kásipkerlik negizderin oqyp, hobbıin tabysqa aınaldyrdy.
«Ózimdi qyzyqtyratyn salany kásipke aınaldyrýǵa bel býdym. Alǵashynda bir omartadan bastap, 50 myń ara ustadym. Qazir alma baǵynda tórt úıshik, onda 200 myń ara bar. Shóptiń túri kóp, tipti maqsary alqabyna ara jiberiledi. «Medovık» kooperatıviniń belsendi múshesi bolyp aldym. Al oǵan deıin aýyl mektebiniń aýla sypyrýshysy bolyp eńbek ettik. Jańa is bastaý týraly oılamaǵan edim. Kóz qorqaq, qol batyr eken», - dedi Aleksandr Krasılnıkov.
Omartashy ózi óndirgen baldy brendke aınaldyrýdy kózdep otyr. Bıyl sharýashylyǵyn keńeıtip, úzdiksiz tapsyrys qabyldady.
«Baldyń emdik qasıetin kóp adam biledi. Ári taza ónimdi dúkennen tabý qıyn. Aldaǵy ýaqytta arnaıy qutyǵa salyp, ataýymen satylymǵa shyǵarǵym keledi», - dedi kásipker.
Aıta keteıik, «Bastaý» jobasy Aqtóbeniń Qobda aýdanynda 2018 jyly alǵash ret iske asyryldy. Barlyǵy 91 adam oqyp, 22-si nesıe alyp, isin bastady. Olarǵa 62 mıllıon teńgeden astam qarjy berildi.
Qobda aýdany boıynsha trener Bazarhan Qulmanovtyń aıtýynsha, bıyl 70 turǵyn kásipkerlik negizderin meńgerdi. Bilim alǵandardyń keıbiri isin bastap ketti. 2018 jyly «Eńbek» baǵdarlamasy aıasynda qolǵa alynǵan «Bastaý» jobasyna 2 myńnan astam aqtóbelik qatysty. Onyń 500-den astamy nesıe alyp, kásip bastaǵan.
