Aqtóbede aýyz sý tapshylyǵy máselesin sheshý úshin jerasty sý ken ornyn ıgerý qajet
AQTÓBE. KAZINFORM — Sarybulaq jerasty sý ken ornyn ıgerýge 13,1 mlrd, Moıseevke 33,3 mlrd teńge qajet. Eki joba Aqtóbe qalasyndaǵy turǵyn alaptardyń máselesin sheshýge baǵyttalady.
Aqtóbeniń Yrǵyz aýdanynda sý tapshylyǵy máselesi birneshe jyldan beri sheshilmeı keledi. Turǵyndardyń bir bóligi tańerteń, túste jáne keshke eki saǵattan sý jınap alady.
— Yrǵyz aýylyn turaqty aýyz sýmen qamtamasyz etý maqsatynda Aıyrqyzyl–Aqshı sý aıdaý stantsııasyn rekonstrýktsııalaý jumystary júrgizilip jatyr. Joba aıasynda sý qubyrlary jańartylyp, qosymsha 7 uńǵyma qazyldy. Jobany jyl sońyna deıin aıaqtap, paıdalanýǵa berý josparlanyp otyr. Aýdan ortalyǵynyń jer bederiniń ereksheligine baılanysty aýyldyń tómengi bóligindegi kóshelerde aýyz sýdyń berilýi turaqty. Sý qysymynyń jetkiliksiz bolýyna baılanysty aýyldyń eski bóligindegi kóshelerde ýaqytsha úzilis bolady. Bul kezde turǵyndardyń ótinishi negizinde aýyz sý arnaıy sý tasymaldaýshy kólik arqyly jetkiziledi. Al aýyldyń jańa bóligindegi turǵyn úıler ortalyqtandyrylǵan aýyz sýmen turaqty qamtamasyz etildi, — dep habarlady Yrǵyz aýdany ákimdigi.
Aqtóbede bıyl bes aýylda sýmen jabdyqtaý jelisi qaıta jańartylady. Olar Mártók aýdanynyń Keńsahara, Haziret, Shalqar aýdanynyń Qaýyljyr, Temir aýdanynyń Shubarqudyq aýylyndaǵy Qazaqaýyl, Aqqudyq shaǵyn aýdandaryndaǵy sý qubyry jelileri jáne Yrǵyz aýdany Aıyrqyzyl-Yrǵyz sý aıdaý stantsııasy.
— Aqtóbe qalasyn sýmen qamtamasyz etý maqsatynda 5 mańyzdy joba iske asyrylady. Sonyń ishinde Qundaqtyqyr sý stantsııasyn jańǵyrtý jáne keńeıtý, sý stantsııasynan keletin sý qubyrynyń ekinshi jelisin salý. Bul eki jobanyń quny — 18 mlrd teńge. Aqtóbe qalasynyń sý tazartý qurylystaryn salý 14 mlrd, Sarybulaq jerasty sý ken ornyn ıgerý 13,1 mlrd, Moıseev jerasty sý ken ornyn ıgerý 33,3 mlrd teńge bolady. Onyń ishinde Sarybulaq jáne Moıseev sorǵy stantsııasynyń qurylysy jobasy boıynsha memlekettik saraptamanyń oń qorytyndysy alyndy, respýblıkalyq bıýdjetten qarjylandyrýǵa usynyldy. Qalǵan úsh jobanyń jobalyq-smetalyq qujaty ázirlenip jatyr. Osy jobalar iske assa Aqtóbe qalasynda táýligine qosymsha 70 000 tekshe metr sý beriledi jáne turǵyn alaptardy sýmen jabdyqtaý máselesi sheshiledi, — dep habarlady Aqtóbe oblystyq energetıka jáne turǵyn úı — kommýnaldyq sharýashylyǵy basqarmasy.
Búginde aýyz sýmen jabdyqtaý óńirdegi eldi mekender boıynsha 94,4% jetti.
Buǵan deıin Aqtóbedegi gazben qamtylǵan aýyldar týraly jazǵanbyz. Jospar boıynsha úsh aýdanda 8 aýylǵa gaz qubyry tartylady.
