Aqtóbede aýyldasyn pyshaqtap óltirdi dep aıyptalǵan stýdent sottaldy
AQTÓBE. KAZINFORM — Jaryssózde prokýror sottalýshyny kináli dep tanyp, 8 jylǵa bas bostandyǵynan aıyrýdy surady. Sot 9 jylǵa úkim kesip, jábirlenýshiniń azamattyq talap aryzyn ishinara qanaǵattandyrdy.
Aqtóbe oblystyq qylmystyq ister jónindegi mamandandyrylǵan aýdanaralyq sotynda qatarlasy ári aýyldasy Álıhan Jánibekovke pyshaq suǵyp alǵan stýdenttiń isi qaraldy. Oǵan Qylmystyq kodekstiń «Adam óltirý» baby boıynsha aıyp taǵyldy. Sottalýshy ózine taǵylǵan aıypty moıyndamady, qorǵanǵanyn aıtty.
— Qylmystyq kodekstiń 99-baby 2-bóligi 9 jáne 14 tarmaqtarymen kináli dep tanylyp, 9 jylǵa bas bostandyǵynan aıyrý jazasy taǵaıyndalsyn. Jazasyn qylmystyq atqarý júıesiniń ortasha qaýipsiz mekemesinde ótesin. Jábirlenýshiniń talap aryzy ishinara qanaǵattandyrylsyn. Jánibek Álımanovtyń paıdasyna 2,3 mln teńge materıaldyq shyǵyn, 15 mln teńge moraldyq zııan, 1 mln teńge ókildiń kómegi óndirilsin. Raýan Nııazmaǵambetovanyń paıdasyna 15 mln teńge moraldyq zıyn óndirilsin, — dedi sýdıa A. Sabyrov.
Sot Shalqar qalasyndaǵy ahýaldy, onyń ishinde jastar arasyndaǵy tóbelesti polıtsııa baqylaýy tıis dep sanap, jekeshe qaýly shyǵardy. Sýdıa aýdanda qoǵamdyq qaýipsizdikti qamtamasyz etý, quqyqbuzýshylyqtyń aldyn alý jumysy óz deńgeıinde júrgizilmegenin aıtty.
— Kámelet jasqa tolmaǵandarmen jumys durys júrgizilmeıtini anyqtaldy. Shalqarda «Maıak» jáne «Rabochıı» toptarynyń arasynda kıkiljiń bolǵan. Keıin asa aýyr qylmys tirkeldi. Jábirlenýshi, sottalýshy jáne kóptegen kýá túngi ýaqytta ata-ananyń qaraýynsyz júrgen. ıAǵnı polıtsııa kámeletke tolmaǵandarmen durys jumys júrgizbegen. Sol kezde de kámeletke tolmaǵan sottalýshy anasynyń atyndaǵy kólikti zańsyz basqarǵan. Aýdandyq polıtsııa bóliminiń mundaı jaǵdaıda eshqandaı shara qoldanbaıtyny kórinedi, — dedi sýdıa.
Sot úkiminen soń eki tarap ózara janjaldasyp qaldy. Sottalýshynyń týǵan-týystary úkimge qarsylyǵyn bildirdi. Al jábirlenýshi tarap qylmysty jasóspirim kezinde jasaǵandyqtan jaza merzimi az ekenin aıtty.
— Biz 20 jyl bas bostandyǵynan aıyrýdy suraǵan edik. Biraq qylmysty kámelet jasqa tolmaı jasaǵany eskerildi. Álıhan ulym óte aqkóńil, dostary arasynda syıly edi. Ol aq kóılek kıip, memlekettik qyzmetshi bolýdy armandady. Ol armanyna jete almady, — dedi Raýan Nııazmaǵambetova.
Eske salsaq, oqıǵa bıyl naýryz aıynyń ortasynda Shalqar qalasynda boldy. «Maıak» jáne «Rabochıı» tobynyń (qala ishindegi eki shaǵyn aýdan — red.) 2008 jáne 2010 jyly týǵan balalary arasynda kıkiljiń bolady, sońy qaıǵyly aıaqtaldy.
