Aqtóbede aýyl ákiminiń qolyndaǵy qyzǵaldaqtyń túrin anyqtaý úshin saraptama taǵaıyndaldy

AQTÓBE. KAZINFORM – Q.Jubanov atyndaǵy aýyldyq okrýg ákimi Lázzat Berdibaevanyń qolynda qyzǵaldaqtyń qaı túri bolǵanyn anyqtaý kerek. Sýdıa búgin saraptama taǵaıyndap, isti ýaqytsha toqtatty.

Aqtóbe oblystyq kámeletke tolmaǵandar isteri jónindegi mamandandyrylǵan aýdararalyq sotynda Q.Jubanov atyndaǵy aýyldyq okrýg ákimi Lázzat Berdibaevaǵa qatysty is jalǵasty.

Onda sýdıa sheshimdi oqydy. 

- Sotqa Muǵaljar aýdany ákiminiń minezdemesi tústi. Minezdeme boıynsha L.Berdibaevanyń qyzmet barysynda eshqandaı tártiptik jazaǵa tartylmaǵany, jumysyn jaqsy atqaratyny, halyqpen syılastyqta jumys isteıtini kórsetilgen. Ákimshilik isti qaraý barysynda sot kelesi sheshimge keledi. Lázzat Berdibaevaǵa qatysty toltyrylǵan hattamada kózdelgen negizderdi jan-jaqty jáne obektıvti qaraý úshin Ákimshilik quqyqbuzýshylyq týraly kodekstiń 757, 777, 824, 829 baptaryn basshylyqqa alyp, sot óz bastamashylyǵymen qyzǵaldaqtardyń túrin anyqtaý úshin arnaýly saraptama taǵaıyndaýǵa uıǵardy. Sol sebepten ákimshilik istiń qaralý merzimi saraptama aıaqtalǵanǵa deıin toqtatylady,- dedi sýdıa. 

Aıta keteıik, sáýir aıynyń sońynda Muǵaljar aýdany Qudaıbergen Jubanov atyndaǵy aýyldyq okrýg ákimi Lázzat Berdibaevanyń qyzǵaldaq ustap otyrǵan fotosy áleýmettik jelige jarııalandy. 

Keıin ákimniń qylmystyq emes, ákimshilik jaýapqa tartylatyny belgili boldy.

Aqtóbe oblystyq kámeletke tolmaǵandar isteri jónindegi mamandandyrylǵan aýdararalyq sotynda qaralyp, Lázzat Berdibaevaǵa Ákimshilik quqyqbuzýshylyq týraly kodekstiń 127 baby 1 bólimi boıynsha hattama toltyrylǵany aıtyldy. Alaıda aýyl ákimi óz kinásin moıyndamady.