Aqtóbede aýyl ákimderiniń forýmy ótti
AQTÓBE. KAZINFORM - Aqtóbede alǵash ret uıymdastyrylǵan aýyl ákimderi forýmynda ózekti máseleler talqylanyp, usynystar aıtyldy.
Jıynǵa partııa Hatshysy Erjan Jylqybaev, Májilis depýtaty Qazybek Álishev, oblys ákimi Ashat Shaharov jáne «AMANAT» partııasynan saılanǵan aýdandyq, qalalyq, aýyldyq okrýg ákimderi, máslıhat depýtattary, departament jáne basqarma basshylary qatysty.
«Damyǵan demokratııalyq qoǵam qurý - Memleket basshysynyń negizgi baǵyttarynyń biri. Prezıdent ár Joldaýynda elimizde ádildik pen demokratııa prıntsıpterin nyǵaıtý jolynda júıeli túrde jaǵdaı jasalyp jatqanyn aıtyp keledi. Qazirgi tańda óńirde 157 ártúrli deńgeıdegi ákim bar. Prezıdent Qasym-Jomart Kemelulynyń 2021 jylǵy Jarlyǵynan keıin 155 qala jáne aýyl ákimderiniń saılaýy ótkizildi. Sonymen birge, 2023 jyly 3 aýdan ákimi pılottyq jobamen tikeleı saılandy. Partııanyń jáne ózderińizdiń saılaýaldy baǵdarlamalaryńyzdyń oryndalýyn qatań baqylaýda ustaý qajet. Partııalar men ákimderdiń belgilengen mindettemelerdi tıimdi oryndaý azamattardyń senimin saqtaýǵa múmkindik beredi», - dedi óńir basshysy forýmnyń ashylý rásiminde.
Partııa hatshysy Erjan Jylqybaev óz sózinde az ǵana ýaqyttyń ishinde elimizdegi reformalardyń zańnamalyq kesheni ázirlengenin atap ótip, saıası ınstıtýttar qaıta jańǵyrýdan ótkenine, Májilis pen máslıhattar kóppartııaly bolǵanyna, birmandatty depýtattar oralǵanyna nazar aýdardy.
«Bul Reformalar «AMANAT» partııasyna da tikeleı áser etti. Jańa qoǵamdyq-saıası ortada, partııada júıeli ishki ózgerister júrgizildi, halyqpen jumys tásilderi jańartyldy. Partııa saılaýshylardyń talap-tilegine negizdelgen jumysqa basymdyq berýde. Qoǵamda abyroıy bar, laıyqty kandıdattardy usynyp keledi. Bul Májilis, máslıhattar jáne ákimder saılaýlarynda halyqtyń senimine ıe bolýǵa múmkindik beredi. Sol sebepti, «AMANAT» partııasy jergilikti jerdegi júıeli jumysqa nazar aýdaryp, elimizdiń barlyq aımaqtarynda Aýyl ákimderiniń forýmy ótkizýde», - dedi ol.
Partııa hatshysy aýyl ákimderiniń saılaýyna, Saılaýaldy baǵdarlama men partııalyq jobalardyń júzege asyrylýyna, qoǵamdyq qabyldaýlardyń jumysyna jáne jastarmen jumys barysyna keńirek toqtaldy. Ol forýmda aıtylǵan usynystar men ıdeıalar, tyń bastamalar «AMANAT» partııasy atynan saılanǵan aýyl ákimderiniń tabandy jumysy men kásibı sheberligine jańa serpin beretinin alǵa tartty.
Forýmda moderatorlyq etken partııanyń oblystyq fılıaly tóraǵasy Erbol Danaǵulovtyń aıtýynsha, Aqtóbe oblysynda 2021 jyldyń shildeden bastap 155 aýyl ákimderiniń saılaýy ótkizildi, onyń ishinde partııadan usynylǵan 141 (90%) kandıdat jeńiske jetken. Qazirgi tańda Aqtóbe oblysynda 7 qala, 135 aýyldyq okrýg bolsa, olardyń 133-inde «AMANAT» partııasynyń músheleri ákim bolyp otyr.
Jıynda «AMANAT» partııasynan saılanǵan Qobda aýdany jáne Mártók aýdany Táńirbergen aýyldyq okrýginiń ákimderiniń baıandamasy tyńdaldy. Forým jumysy qalalyq, aýyldyq okrýg ákimderine arnalǵan sektsııalyq jumys jáne semınar trenıngtermen jalǵasty.
