Aqtóbede aýyl ákimi óz-ózine qol jumsady
AQTÓBE. KAZINFORM — Keńqııaq aýylynyń ákimi Qýanyshbek Serikjanovtyń óliminen keıin tergeý júrip jatyr. Polıtsııa ózge aqparatty taratpady.
Aqtóbe oblysy Temir aýdany Keńqııaq aýyldyq okrýginiń ákimi Qýanyshbek Serikjanov sýıtsıd jasady. Aqtóbe qalasynyń polıtsııa basqarmasy tergeý júrgizip jatyr.
— 1983 jyly týǵan er adamnyń qaıtys bolý faktisi boıynsha sotqa deıingi tergep-tekserýdi bastady. Tergeý barysynda oqıǵanyń barlyq mán-jaıy anyqtalatyn bolady. Tergeý múddesine baılanysty ózge aqparat jarııa etýge jatpaıdy, — dep habarlady Aqtóbe oblystyq PD baspasóz qyzmeti.
Aqtóbe oblysy ákiminiń baspasóz qyzmetiniń habarlaýynsha, Qýanyshbek Serikjanov 4 mamyr kúni jumystan shyǵatynyn aıtyp, aryz jazǵan. 5 mamyr kúni aryzy qabyldanyp, jumystan bosatylǵan.
Qýanyshbek Serikjanov 2014 jyldan bastap memlekettik qyzmette jumys istedi. 2023 jyldyń mamyr aıynan Temir aýdany Keńqııaq aýyldyq okrýgi ákiminiń orynbasary, 2023 jylǵy 15 qazannan bastap Keńqııaq aýyldyq okrýginiń ákimi qyzmetin atqarady.
Aıta keteıik, byltyr Temir qalasynda da ákim sýıtsıd jasady.
Sondaı-aq Alǵa aýdany Bestamaq aýyldyq okrýginiń ákimi óz-ózine qol jumsamaq boldy. Ol aýrýhanadan shyqqan soń jumysqa qaıta qosyldy.
