Aqtóbede áýejaıdyń ushý-qoný jolaǵyndaǵy plıtalar aýystyrylady

AQTÓBE. KAZINFORM – Áýejaıdaǵy jolaqta barlyǵy 1200 plıta aýystyrylady.

Aqtóbe oblystyq jolaýshylar kóligi jáne avtomobıl joldary basqarmasy basshysynyń orynbasary Eset Amanbaevtyń aıtýynsha, jumys bıyl atqarylady. 

- Áýejaıdyń ushý-qoný jolyna jyl saıyn jóndeý jasalyp jatyr. Bıyl 1200 plıta aýystyrylady. Oǵan oblystyq bıýdjetten qarjy qarastyryldy. Bul áýejaı 6 aıdyń ishinde 532 myń jolaýshyǵa qyzmet kórsetti. Ótken jylǵa qaraǵanda 5% artyp otyr. Jalpy áýejaı 10 baǵytta reıs oryndaıdy. Altaýy ishki. Olar: Almaty, Astana, Atyraý, Túrkistan, Aqtaý, Shymkent qalalary. Tórteýi halyqaralyq,- dedi Eset Amanbaev. Aıta keteıik, áýejaıdaǵy plıtalardy aýystyrýǵa 500 mln teńge qarastyrylǵan. 

Eske salsaq, 2022 jyly Aqtóbedegi halyqaralyq áýejaıdy komıssııa tekserip, ushý-qoný alańyndaǵy birneshe kemshilikti anyqtady. Aldymen 10 kúnge jabylatynyn habarlap, keıin jumysyn qaıta jandandyrdy.

Sodan beri jóndeý jumysy kezeń-kezeńimen jalǵasyp jatyr.