Aqtóbede áýekompanııa qyzmetkerlerin balaǵattaǵan jolaýshy reısten túsirildi

ASTANA. KAZINFORM — Aqtóbe áýejaıynda qoǵamdyq tártipti buzǵan mas jolaýshy reısten túsirildi, dep habarlaıdy Polisia.kz saıty.

Aqtóbe qalasy áýejaıyndaǵy jelilik polıtsııa bólimshesiniń qyzmetkerleri Aqtóbe — Almaty baǵytyndaǵy áýe reısiniń 38 jastaǵy jolaýshysyn anyqtap, ustady. Ol ushaqqa otyrǵyzý kezinde masań kúıde bolyp, áýekompanııa qyzmetkerlerine balaǵat sózder aıtqan jáne eskertýlerge qulaq aspaǵan. 

— Quqyq buzýshy polıtsııa bólimine jetkizilip, oǵan qatysty alkogoldik ishimdik ishkeni nemese qoǵamdyq oryndarǵa masań kúıinde kelgeni úshin jáne usaq buzaqylyq jasaǵany úshin 5 AEK (18 460 teńge) mólsherinde aıyppul salýmen ákimshilik hattama toltyryldy. Usaq buzaqylyq boıynsha is sheshim qabyldaý úshin sotqa joldandy., — delingen habarlamada.

Esterińizge sala keteıik, QR ákimshilik kodeks boıynsha usaq buzaqylyq jasaǵany úshin 20 AEK mólsherinde aıyppul nemese 15 táýlikke deıingi merzimge ákimshilik qamaqqa alý qarastyrylǵan.

Buǵan deıin Atyraýda jyl basynan beri kólik róline otyrǵan 732 mas júrgizýshi ustalǵany habarlandy.