Aqtóbede aýdandyq aýrýhana órtenip, 32 adam evakýatsııalandy
NUR-SULTAN. QazAqparat – Ótken túni Qazaqstannyń tórt óńirinde órt shyqty, dep habarlaıdy QazAqparat Tótenshe jaǵdaılar komıtetine silteme jasap.
9 maýsym kúni saǵat 23:02-de Aqtóbe oblysynyń Temir aýdanyndaǵy ortalyq aýdandyq aýrýhananyń ekiqabatty ǵımaratynda 530 sharshy metr aýmaqqa taraǵan órt shyqty. TJD qyzmetkerleriniń kúshimen 32 adam qaýipsiz jerge kóshirilgen.
Órt 10 maýsym kúni saǵat 00:41-de tolyq sóndirildi. Qaza tapqandar men zardap shekkender joq. Órttiń shyǵý sebebi anyqtalýda.
Ony sóndirýge TJD kúsh-quraldary men aýdandyq polıtsııa bóliminiń qyzmetkerleri (22 adam, 5 tehnıka) jumyldyrylǵan.
10 maýsym kúni saǵat 00:50-de Aqmola oblysynyń Stepnogor qalasyndaǵy «Rassvet» saıajaı kooperatıvinde ornalasqan turǵyn úı, odan bólek turǵan sharýa qurylysy, úıdiń qorshaýy men jylyjaı órtendi. Úıdiń ústińgi jabyny opyrylyp qulaǵan.
Jalyn 28 sharshy metr aýmaqty sharpydy. Órt saǵat 03:40-ta sóndirildi. Oqıǵa ornynan bes adamnyń denesi tabyldy. Qaza tapqan taǵy bir er adamnyń kim ekeni jáne órttiń shyǵý sebebi anyqtalýda.
Órtpen kúreste TJD kúsh-qurylymdary, kezekshi tergeý jedel tobynyń qyzmetkerleri (12 adam, 3 tehnıka) jumyldyrylǵan.
10 maýsym kúni saǵat 01:21-de Shyǵys Qazaqstan oblysynyń Semeı qalasyndaǵy «Delfın» monsha kesheniniń aýmaǵynda ornalasqan eki qabatty ǵımarattyń ekinshi qabaty órtenip, jalyn 40 sharshy metr aýmaqqa taraǵan. Órt saǵat 02:37-de tolyq sóndirildi.
Órt sóndirýshiler kelgenshe ekinshi qabattaǵy terezeden sekirip shyqqan eki adam aýrýhanaǵa jetkizildi. TJD qyzmetkerleri arnaıy satynyń kómegimen úsh adamdy qutqardy.
Órtpen kúreske TJD, kezekshi tergeý jedel tobynyń 30 qyzmetkeri, 8 tehnıka birligi jumyldyryldy.
10 maýsym kúni saǵat 00:41-de Qostanaı oblysyna qarasty Fedorov aýdanynyń Pervomaı aýylynda eki páterli jekemenshik turǵyn úıdiń 60 sharshy metrinde órt shyǵyp, kórshi páterge tarady. Jalyn jalpy 100 sharshy metr aýmaqty sharpyǵan. Órt saǵat 04:00-de tolyq sóndirildi.
Onyń saldarynan balalardy qutqarý kezinde kúıik shalǵan 1972 jáne 1990 jylǵy er adamdar men 2014 jylǵy bir bala aýrýhanaǵa jetkizildi. Órttiń shyǵý sebebi anyqtalýda.
Tilsiz jaýmen kúreste TJD, kezekshi tergeý jedel toby, erikti órt sóndirýshiler qurylymynan 26 adam men 5 tehnıka jumyldyryldy.
