Aqtóbede aýdandyq bilim bóliminiń basshysy sottaldy

AQTÓBE. KAZINFORM — Aqtóbe oblysy Shalqar aýdandyq bilim bóliminiń basshysy qyzmetin asyra paıdalanǵany úshin sottaldy. Ol mektep dırektorynan aqsha jınatyp, jumsap jibergen.

Іs Qylmystyq kodekstiń 361-baby 1-bóligi boıynsha qaraldy. Aıyptaý aktisine súıensek, Shalqar aýdandyq bilim bóliminiń basshysy qyzmetin atqarǵan laýazymdy tulǵa mektep dırektoryna qońyraý shalyp, áriptesterinen aqsha jınaýdy tapsyrady. Nátıjesinde jınalǵan 1 500 000 teńge aqshany ıemdenip, óz qajetine jumsaǵan. Bul qylmystyq is sotqa túspeı turyp, prokýror men sottalýshy arasynda protsestik kelisim jasaldy. Sottalýshy ózine taǵylǵan aıypty moıyndady. Memlekettik aıyptaýshy protsestik kelisimge sáıkes sottalýshyǵa 1 jyl bas bostandyǵyn shekteý jazasyn taǵaıyndaýdy surady. 

— Sot úkimimen sottalýshy kináli dep tanylyp, oǵan memlekettik qyzmette laýazymdardy atqarýǵa ómir boıyna tyıym sala otyryp, 1 jyl merzimge bas bostandyǵyn shekteý jazasy men probatsııalyq baqylaý taǵaıyndaldy. Sottyń úkimi zańdy kúshine engen joq, — dep habarlady Shalqar aýdandyq sotynyń baspasóz qyzmeti.

Aıta keteıik, bıyl jazda Shalqar aýdandyq bilim bóliminiń basshysy men mektep dırektoryn Antıkor ustap, qamaýǵa aldy. https://youtu.be/yuyrSiJfIbE?si=aEViWL0k2t8mhdvp Osy oqıǵadan soń tergeý júrip, is ekige bólindi. Ekinshi is mektep dırektoryna qatysty qaralady. 

Eske salsaq, Aqtóbede medıtsına ýnıversıtetiniń grantyna túsirýge ýáde etken aıyptalýshy alaıaqtyǵy úshin sottaldy. Ol úsh jyldyq jazasyn bostandyqta júrip óteıdi.