Aqtóbede aýdan turǵyndary naýqas oqýshynyń emine aqsha jınap berdi
AQTÓBE. QazAqparat -Aqtóbe oblysy, Shalqar aýdanynyń turǵyndary 8 jastaǵy Іńkár Baqytjanovanyń emine qarjy jınap jatyr. Ozat oqýshynyń emi úshin mektep túlekteri de qaıyrymdylyq kontsertin ótkizdi, dep habarlaıdy QazAqparat tilshisi.
Іńkár Baqytjanova ozat, alǵyr ári elgezek oqýshy. Ol únemi alda júredi, kóptiń kóz qýanyshyna aınaldy. Alǵashynda jótelip, denesi kógerip ketken. Dárigerler sýyq tıip aýyrǵan bolýy múmkin dep em júrgizedi. Biraq derti asqynyp, oblys ortalyǵy Aqtóbede aqqan aýrýyna shaldyqqany anyqtaldy.
«Qan tapsyryp, aýrý belgileri bar ekeni belgili boldy. Genetıkke qaralyp, aqqan dıagnozy qoıyldy. Sodan birden Astanaǵa joldama berilip, bir aptadan beri em qabyldap jatyr. Eki balam stýdent. Sol ekeýinen qan alyp, saraptamaǵa jiberildi. Eger sáıkes kelse baýyrlary donor bola alady, al kelmese dúnıejúzilik donorlar qoryna kezekke qoıylyp, izdeý júrgiziledi. Qazir hımııalyq em qabyldap jatyr»,- dedi Іńkárdiń anasy Anar Narymbetova.
Estimegen, kórmegen derttiń belgilerin ata-anasy alǵashynda bilmedi. Aıaǵy, qoly kógerip júrgende qulap qaldy dep topshylady. Mektep oqýshysynyń aýyr dertke shaldyqqanyn estigen aýdan jastary birden kómektesýdiń jolyn izdedi. Olar aýdandaǵy dúkender men demalys oryndarynyń ıelerimen kelisip, qaıyrymdylyq jáshigin ornatty.
«Barlyq dúken, sýpermarketke jáshik qoıylyp, alǵashqy aqshany berdik. Barlyǵy 1,4 mıllıon teńge jınaldy. Aýyldyń kishkentaı qyzy aýyryp qaldy degendi estip, barlyǵy kómektesti, qaıyrymdylyq is jasady. Aldaǵy ýaqytta jármeńke nemese kóńildi tapqyrlar klýbynyń baıqaýyn ótkizýdi kózdep otyrmyz. Mektep túlekteri de qaıyrymdylyq kontsertin ótkizip, qarjyny ózderi jınady. Qazir aýdanda jan-jaqtan kómek qolyn sozyp jatqan adam kóp. Biraq biz toqtap qalmaı, qarjy jınaýdy búkil Qazaqstan boıynsha júrgizgimiz keledi»,- dedi «Biz birgemiz» erikti jastardan quralǵan qaıyrymdylyq tobynyń múshesi Aslan Lekerov.
