Aqtóbede aýdan ákimdigi eki sharýaǵa bir jer berip, basy daýǵa qaldy
AQTÓBE. KAZINFORM — Baıǵanın aýdanynyń ákimdigi 2007 jyly «Arna» sharýa qojalyǵynyń 25 sotyq jerin jekeshelendirýge ruqsat berdi. 2017 jyly «Beket» sharýa qojalyǵy dál sol sharýashylyq ornalasqan jerdi qosa eseptegende 187 gektar aýmaqty jalǵa alady. Sotta eki tarap ta óz quqyǵyn qorǵady.
Aqtóbe oblysy Baıǵanın aýdany Aqmola qystaǵyndaǵy 25 sotyq jer «Arna» sharýa qojalyǵynyń ıeliginde. Mundaǵy úıdiń ǵana tehnıkalyq tólqujaty bar. Alaıda mal qoranyń qujaty rásimdelmegen, ári jer arnaıy kartaǵa engizilmegen. Arada 10 jyl ótkende Baıǵanın aýdany jer qatynastary bólimi bul aýmaqtaǵy 187 ga jerdi «Beket» ShQ-na 49 jylǵa jalǵa beredi. Eki tarap qatar turyp jumys júrgizgenimen, mal-múlik daýynan soń arajigi ajyrap, «Beket» ShQ-y «Arna» ShQ basshysyn sotqa beredi. Sot «Beket» sharýa qojalyǵynyń talap aryzyn qanaǵattandyryp, qorany buzý týraly sheshim shyqty. Sol kezde «Arna» ShQ apellıatsııalyq shaǵym túsirip, jeńildi. Ári kúzde 600 bas qoı, iri qara mal turatyn qorany buzý týraly sheshimdi 3 aıǵa keıingi shegerýdi surady. Qystyń ortasynda daý ýshyǵa túsip, iske sot oryndaýshylary aralasa bastady.
— Baıǵanın aýdany ákimdigi 2017 jyly biz ıelik etip otyrǵan jerdi, onyń aınalasyn, ıaǵnı, 187 ga jerdi «Beket» ShQ beredi. 2019 jyly tehnıkalyq túgendeý bıýrosynan mamandar kelip, qazyǵyn qaqty. Dál sol kezde biz ózimizdiń ıeliktegi jerdi aıtyp, eskerttik. Alaıda bizdiń jerimiz, úı men qoranyń bári «Beket» ShQ ıeligine jazylyp ketedi. Bir jerge eki adam ıelik etip, qıyndyq bastaldy. Ony tek sot tártibimen retteý kerek eken. Qolda qujat bolǵan soń mán bermeı júre berdik. Eki arada kelispeýshilik týyndap, polıtsııaǵa aryz túsirip, shıelenise berdi. Jer daýy, mal daýynan keıin «Beket» sharýa qojalyǵynyń basshysy 2024 jyly qorany buzyp alsyn dep sotqa aryz túsirdi. 2024 jyly sot «Beket» ShQ shaǵymyn qanaǵattandyrdy. Keıin men apellıatsııalyq shaǵym berip, utyldym. Jańa qorǵaýshy jaldaǵan soń jerdi qaıtarýǵa shaǵym túsirdim. 2025 jyly ákimshilik sotta is qaraldy. Ol kezde Baıǵanın aýdany ákimdigin sotqa berdik. Aýdan ákimdigi qatelikti moıyndap jerdiń jekemenshik ekenin, al «Beket» ShQ-y 49 jylǵa jalǵa alǵanyn moıyndady. Sot aryzdy qanaǵattandyrdy, Baıǵanın aýdany ákimdigi qaýlysynyń kúshin joıý týraly sheshim shyǵardy. Qazirgi kezde sharýa qojalyǵy apellıatsııalyq shaǵym túsirip otyr, — dedi sharýa Qudaıbergen Orynbasarov.
Sot kabınetindegi is materıalyna súıensek, jaýapker Baıǵanın aýdany ákimdigi jerdi qaıtarý týraly aryzdy qanaǵattandyrýdy suraǵan. Al Baıǵanın aýdany jer qatynastary bólimi men Qopa aýyldyq okrýginiń apparaty sheshimdi sottyń ózine qaldyrǵan. Aqtóbe oblystyq mamandandyrylǵan aýdanaralyq ákimshilik soty aryzdy qanaǵattandyryp, 25 sotyq jerge qatysty qaýlynyń kúshin joıý jóninde sheshim shyǵardy. Alaıda ekinshi tarap apellıatsııalyq shaǵym túsirip otyr.
— «Beket» ShQ basshysy qorany buzý týraly ózge sot sheshimin oryndaýdy talap etip otyr. Endi májbúrli oryndatýy múmkin. Al biz qystyń ortasynda maldy qaıda aparamyz? Bizge eki aı kerek. Eń bolmaǵanda naýryzǵa deıin jetsek te bolady. «Aýyl amanaty» jobasyna qatysyp, 18,3 mln teńge nesıe alyp, qoı sharýashylyǵyn damytyp otyrmyn. Qysta 600 bas qoıdy, túıe men sıyrdy aıdap kete almaımyn. Byltyr konkýrs arqyly ózge jer aldym. Alaıda konkýrs qorytyndysy 2025 jyldyń 30-jeltoqsanynda shyqty. Men alǵan jerge qora salyp úlgermedim. Ákimdiktiń jibergen qateligi bul. Bir kásipkerdiń múddesi úshin ekinshi kásipker quqyǵynyń buzylýy durys emes, — dedi Qudaıbergen Orynbasarov.
Aıta keteıik, Aqtóbede bıyl 164 myń gektar jer telimi qaıta aınalymǵa shyǵarylady. Jospar maýsym aıyna deıin oryndalýy tıis. Sonymen birge aýyl sharýashylyǵy maqsatyndaǵy 80 myń gektar jer ýchaskesi qaıtarylady.