Aqtóbede aýdan ákimderi jappaı qyzmettik kóligin jańartyp jatyr
AQTÓBE. KAZINFORM — Aqtóbede aýdan ákimderi jappaı kóligin jańalap jatyr. Kazinform tilshisi Memlekettik satyp alýdyń qalaı júrgenin saralap kórdi.
Aqtóbe oblysynda aýdan ákimderiniń qyzmettik kólikterin jańartyp jatqany týraly aqparat jeldeı esip júr. Kazinform tilshisi ashyq aqparat kózderi arqyly olardyń kólik satyp alýǵa bıýdjettiń qansha qarjysyn jumsaǵanyn salystyryp kórdi.
Máselen, Alǵa aýdany ákiminiń apparaty birden eki kólik alýdy jón kórgen. Árqaısysyna 14 500 000 teńge usyndy. Eki kólik bıýdjetke 29 mln teńgege shyǵyp tur.
Tehnıkalyq talap boıynsha A klasty kólemi 2 000 tekshe sm bolýy tıis. Kelisimshart jasaldy, jeńimpaz «Hyundai Premium Almaty» JShS.
Al Baıǵanın aýdany ákiminiń apparaty tehnıkalyq erekshelikterge sáıkes jol talǵamaıtyn qyzmettik avtokólikti satyp aldy.
Talap boıynsha kólemi 2993 tekshe sm-den aspaıtyn kólik bolýy tıis. Jetkizýshi — West line ltd jaýapkershiligi shekteýli seriktestigi. Kóliktiń quny 27 mln teńgeden asady.
Muǵaljar aýdany ákimi apparaty bolsa, kólemi 2000 tekshe sm-ge deıingi kólikke tapsyrys bergen. Jetkizýshi — «Agro Holdıng Kazahstan» jaýapkershiligi shekteýli seriktestigi. Konkýrsqa 16 400 000 teńge bólindi.
Áıteke bı aýdany ákimi apparaty da jol talǵamaıtyn kólikke memlekettik satyp alý ótkizdi. Konkýrsqa eki kompanııa qatysyp, WEST TRUCK SERVICE JShS jeńimpaz boldy. Kólik 24 107 000 teńge satyp alyndy.
Mártók aýdany ákiminiń apparaty da jeńil kólikke tapsyrys bergen. Ashyq konkýrs kezinde kólik 11,5 mln teńgege satyp alyndy. Jetkizýshi — Kol-Auto-Great jaýapkershiligi shekteýli seriktestigi.
Hromtaý aýdany ákimi apparatyny jarııalaǵan konkýrs málimetine súıensek, 16 690 000 teńgege jeńil kólik qajet. Qazirgi kezde bul ashyq konkýrs jarııalanyp tur.
Alǵashqylardyń biri bolyp konkýrs jarııalaǵan Yrǵyz aýdany ákiminiń apparaty bolyp shyqty. Munda kólik satyp alýǵa bıýdjetten 26 500 000 teńge qaralǵan. Jetkizýshi — WEST TRUCK SERVICE JShS.
«Sharttyń jalpy somasy — 29 680 000 (jıyrma toǵyz mıllıon alty júz seksen myń tenge nól tıyn) teńge. Ol taýar jetkizýge qatysty búkil shyǵyndy, sondaı-aq Qazaqstan zańnamasynda kózdelgen barlyq alym-salyqty, onyń ishinde QQS 3 180 000 teńgeni (úsh mıllıon júz seksen myń teńge nól tıyn) qamtıdy», — dep jazylǵan.
Demek kólikke bólingen qarjy arta túsken.
Shalqar aýdany ákiminiń apparaty bolsa, 7 550 000 teńgege kólik satyp aldy. Jetkizýshi jeńimpaz — «Syrdarıa Avto» JShS.
Oıyl aýdany da 21 490 000 teńge bólip, kólikke tapsyrys berdi. Alaıda satyp alý ótpedi.
Qarǵaly aýdany ákiminiń apparaty eki kólik satyp alýǵa tapsyrys berdi. Birine 8,1 mln, ekinshisine 11,8 mln teńge usyndy.
Eki satyp alý da ótti. Jetkizýshi — Allur saýda úıi.
Memlekettik satyp alý konkýrsynan Qobda aýdany ákimi apparatynyń da tapsyrystaryn qarap kórdik.
Alaıda óńir boıynsha osy aýdan ákimdiginde ǵana kólik satyp alý konkýrsy kórinbedi.
Eske salsaq, byltyr Kazinform aýdan ákimderiniń aılyǵy týraly jazǵan edi.