Aqtóbede aýdan ákimdigi turǵyndardy tegin betperdemen qamtý jolyn tapty
AQTÓBE. QazAqparat - Aqtóbe oblysy, Temir aýdanynda turǵyndardy tegin betperdemen qamtamasyz etý úshin tigin tsehtary jumysqa kiristi, dep habarlaıdy QazAqparat.
Qazir Aqtóbe oblysynda betperdemen qamtý ózekti problemaǵa aınaldy. Dárihanalarda buǵan deıin 20-30 teńgege satylǵan qorǵanysh quralynyń baǵasy 80-100 teńgege jetti.
«Koronavırýstyń aldyn alý maqsatynda matadan betperde tigip jatyrmyz. Elge óz paıdamyzdy tıgizý úshin maqta matany tańdap aldyq. Balalarǵa jáne eresekterge arnalǵan túri bar. Allergııa týdyrmaıdy, sapaly ári jýyp, útiktep qoldanýǵa bolady», - dedi tigin tsehynyń ıesi Láılá Aktýrına.
Temir aýdany ákimdiginiń sheshimimen betperdelermen birinshi kezekte halyqqa qyzmet kórsetetin mekemelerdiń (HQKO, Qazposhta, bank, aýrýhana men dárihanalar) qyzmetkerleri jáne qyzmet alýshy turǵyndar qamtamasyz etiletin bolady. Ázirge 15-20 myń dana betperdege tapsyrys berildi. Suranys artyp jatqan jaǵdaıda qosymsha ázirlenedi.
Tiginshilerdiń aıtýynsha, bir betperdeni daıyndaý úshin 10 mınýt ýaqyt ketedi. Betperde barlyq talapqa saı, uzaq merzimdi qoldanysqa arnalǵan. Qazirgi ýaqytta Temir aýdanyndaǵy ahýal turaqty.
