Aqtóbede aýadaǵy zııandy zattardyń mólsheri shekti deńgeıden asty
AQTÓBE. KAZINFORM — Aqtóbe, Hromtaý qalalary men Temir aýdanynyń Shubarshı aýylynda atmosferalyq aýanyń lastaný deńgeıi joǵary jáne óte joǵary dep baǵalandy. Eldi mekenderde azot dıoksıdi men kúkirtsýtek mólsheriniń artqany anyqtalǵan.
«Qazgıdromet» RMK atmosferalyq aýanyń sapasyna monıtorıng júrgizip, tamyz aıynyń qorytyndysyn shyǵardy. Monıtorıng kezinde 69 eldi meken qamtyldy. Onyń ishinde 34 eldi mekende atmosferalyq aýa lastanýynyń tómen deńgeıi tirkelse, altaýynda joǵary, úsheýinde óte joǵary deńgeı tirkeldi. Joǵary jáne óte joǵary deńgeıdiń arasynda Aqtóbe, Hromtaý qalalary men Shubarshı aýyly bar.
— Atmosferalyq aýany lastaýdyń negizgi kózderi — «SNPS-Aqtóbemunaıgaz» AQ, «QazaqoılAktóbe» JShS, «Aqtóbe ferroqorytpa zaýyty» jáne «Dóń ken-baıytý kombınaty» AQ «Qazhrom» TUK fılıaldary, «Intergaz Ortalyq Azııa» AQ, «Aqtóbe ÓEM» AQ, «Aqtóbe JEO» AQ. Іlespe gazdy jaǵý shyǵaryndylarynyń úlesi 11,67 myń tonna boldy. Alaý qondyrǵylarynan shyǵatyn barlyq shyǵaryndylardyń 97 paıyzy munaı jáne gaz óndiretin, qaıta óńdeıtin 3 kásiporyn úlesine tıesili. Olar — «CNPC-Aqtóbemunaıgaz» AQ, «QazaqoılAktóbe» JShS jáne «Aman Munaı» JShS, — dep kórsetilgen «Qazgıdromet» RMK habarlamasynda.
Aqtóbe qalasy boıynsha 6 baqylaý beketinen derekter anylǵan. Onyń úsheýi avtomatty stansa bolsa, úsheýin mamandardyń ózderi júrip anyqtaıdy. Qalada azot dıoksıdi, kúkirtsýtek joǵary. Sonymen birge Hromtaý qalasynda kúkirtsýtek joǵary, Shubarshı aýylynda kúkirtsýtek óte joǵary deńgeıge jetken.
— Temir aýdany Shubarshı aýylynda bıyl kúkirtsýtektiń artýy boıynsha 54 jaǵdaı tirkeldi. Bul qatarynan 50 kún boıy aýa lastandy degendi bildirmeıdi. Avtomattandyrylǵan stansa árbir 20 mınýt saıyn ólshem júrgizedi. Bir ret kúkirtsýtek shyǵaryndysy bolsa, ony birneshe ret tirkep, sany artýy múmkin, ıanı eki saǵatta 6 jaǵdaıdy tirkep, osylaı kórsetip turady, — dep habarlady Aqtóbe oblystyq ekologııa departamenti.
Aıta keteıik, búgin el boıynsha 14 qalada aýa sapasy nasharlaıtynyn jazǵanbyz.
