Aqtóbede atty patrýl úsh jasóspirimdi sýdan aman alyp shyqty
AQTÓBE. QazAqparat - Aqtóbede jaǵajaılar men baý-baqsha ujymyndaǵy qoǵamdyq tártipti baqylaıtyn atty patrýl úsh jasóspirimdi qutqardy. Tyıym salynǵan aýmaqqa shomylǵan balalardy ózenniń aǵysy alyp ketken, dep habarlaıdy QazAqparat tilshisi.
Aqtóbede atty patrýl shomylý maýsymy bastalǵan kezde kúzetti kúsheıtti. Turǵyndar tyıym salynǵan jaǵalaýda demalyp, óz ómirine qaýip tóndirgen soń polıtsııa aýmaqty muqııat sholyp júr. Sóıtip Aqtóbede tártip saqshylary úsh jasóspirimdi aman alyp qaldy.
«Aqtóbe qalalyq ІІB jol-patrýldik polıtsııasynyń atty patrýl qyzmetkerleri Sút zaýyty aýdany mańyndaǵy jaǵajaıdyń birinde sýǵa túsip júrgen úsh jasóspirimdi baıqaıdy. Bir mezette olardy ózen aǵysy alyp ketkenin kórdi. Polıtsııa qyzmetkerleri dereý kómekke umtyldy. Aldymen balalardy polıtsııa serjanty Almat Toqtamysov alyp shyqty. Ol sýdan shyqqan boıda jasóspirimdi polıtsııa serjanty Qýanyshbek Faızollaǵa tabystady. Sýǵa qaıta kirip, ekeýin de aman alyp shyqty»,- dep habarlady oblystyq ІІD-niń baspasóz qyzmeti.
Tártip saqshylary balalardy ata-analaryna tapsyrdy.
