Aqtóbede átkenshekten qulap qalǵan bala kóz jumdy

AQTÓBE. KAZINFORM – Aqtóbe qalasy Eset batyr turǵyn alabynda 9 jastaǵy er bala átkenshekten qulap kóz jumdy. Ol qulaǵan kezde ashyq bas-mı jaraqatyn alǵan.

Oqıǵa keshe keshkilik bolǵan. Aqtóbe oblystyq densaýlyq saqtaý basqarmasy baspasóz qyzmetiniń habarlaýynsha, saǵat 19:02–de shaqyrtý túsedi. Ol kezde denesi qurysyp jatyr dep habarlandy. І-sanattaǵy shaqyrtýǵa jedel járdem brıgadasy saǵat 19:09–da jetken. 

— Jedel járdem brıgadasy jetken kezde bala es-túsin bilmeıdi. Kórshileri júregine massaj jasaǵan. 103 qyzmetiniń mamandary birden reanımatsııaǵa kirisip, 30 mınýt boıy qutqarýǵa tyrysty. Biraq ol nátıje bermedi. Saǵat 19:41–de mı qyzmeti toqtady. Qoıylǵan dıagnoz: ashyq bas-mı jaraqaty, bas súıeginiń negizgi bóliginiń, moıyn omyrtqasynyń jabyq synýy. Sonymen birge 103 qyzmeti jetkenshe júrekke massaj jasalǵany belgili. Sol kezde qabyrǵasy zaqymdanyp, ókpege aýa jetpeı qalǵan, - dep habarlady Aqtóbe oblystyq densaýlyq saqtaý basqarmasy baspasóz qyzmeti. 

Aıta keteıik, osy oqıǵadan keıin Qylmystyq kodekstiń 306 baby 3 bóligimen, ıaǵnı, «Qaýipsizdik talaptaryna saı kelmeıtin taýarlardy shyǵarý nemese satý, jumystardy oryndaý ne qyzmetter kórsetý» baby boıynsha is qozǵaldy. Qazir sot aldy tergeý júrip jatyr.

Eske salsaq, Aqtóbe oblysy Shalqar aýdanynyń turǵyny 7 aılyq sábıiniń óliminen soń dárigerlerdiń jazalanýyn talap etip otyr. Balany taksımen tasymaldap, ortalyqqa habar bermegen aq halattylarǵa qatań sógis jarııalandy.