Aqtóbede ata-anasyz turyp kelgen 6 balaǵa eriktiler úı turǵyzyp jatyr
Bul týraly "QazAqparat" tilshisine eriktilerdiń biri Albına Baıanǵalı málim etti.
Eriktiler qazirgi ýaqytta Shynybekovter januıasynyń bitpegen úıin jóndeýge kirisken. Osy aralyqta olarǵa 300-ge tarta erikti kómek kórsetip úlgerdi.
"Úsh táýlik boıy biz múmkindiginshe balalarmen birge boldyq. Biz eń úlken qyzynyń atynan bank rekvızıtterin ashtyq, ol 18-ge toldy, barlyq rekvızıtter jalǵan emes, bank esepshoty onyń atynan ashylǵany ras. Bul qarajat balalardyń ary qaraı ómir súrýine qajet bolady degen nıetpen osy esepshotty ashtyq", - deıdi A. Baıanǵalı.
Onyń aıtýynsha, Aqtóbe jáne aımaq ákimdigi de atalmysh jetkinshekterge kómek qolyn aıanbaı qosyp keledi.
"Qala ákiminiń orynbasary keldi, oblystan quzyrly organdar keldi. Jergilikti organmen biz tyǵyz jumys jasap jatyrmyz. Olar úlken qyzdarynyń kolledjdegi oqý aqysymen máseleni sheship berdi. Ol sońǵy kýrsta oqıdy jáne ol ony tegin oqymaq. Eki bala balabaqshaǵa ornalastyryldy. Úıge gaz tartý boıynsha qujattarmen qarapaıym adamdar aınalysyp jatyr", - deıdi eriktiler shtabynyń jetekshileriniń biri.
Onyń sózinshe, úı qurylysy aıaqtalǵansha, balalar ýaqytsha jaldamaly úıge jaıǵastyrylǵan. Olar tamaqpen jáne kıimmen tolyq qamtyldy.
"Páterdi bir aıǵa, qurylys bitkenshe jaldadyq. Úıdi jóndeý jumystaryn qarapaıym azamattar jasap jatyr. Qurylys materıaldaryn satatyn jergilikti dúken qurylys materıaldarymen qamtýda. Úsh táýlikte kómek qolyn sozǵan azamattar óte kóp boldy. Shamamen 300-ge tarta adam keldi, biri azyq-túlikpen, biri etpen qamtýǵa tyrysty", - dep atap ótti A. Baıanǵalı.