Aqtóbede ata-analardyń shaǵymynan soń balabaqshada tekserý bastaldy
Aqtóbe qalasyndaǵy jeke balabaqshanyń ata-analary balalarynyń jaraqat alǵanyn, mektepke deıingi uıymda sanıtarııalyq talap saqtalmaǵanyn aıtyp, polıtsııaǵa, prokýratýraǵa, oblystyq sanıtarııalyq-epıdemıologııalyq baqylaý departamentine aryz jazdy, dep habarlaıdy Kazinform.
Balabaqshadaǵy kórinis áleýmettik jelige keń tarap ketti.
Oqıǵa ótken aptada Aqtóbe qalasyndaǵy jeke balabaqshada boldy.
— Balabaqshaǵa bir úıden eki bala barady. Meniń qyzym kereýette jatqan kezde eki qolyn joǵary kótergen. Apaıy sol qolynan julqyp qalady. Eger qyzymnyń qoly shyǵyp ketse kim jaýapty bolady? Al ulym jylap turǵan kezde eden jýyp júrgen qyzmetker rezeńke qolǵaby bola tura balamdy nuqyp qaldy. Shynymdy aıtsam, eshkimge aıtpaı kirip baryp, tekserdim. Sanıtarııalyq talap saqtalmaǵan, balalardyń kıimi kireberiste edende jatyr. Bir bala kúrteniń ústinde uıyqtap jatyr. Bala oıyn bólmesiniń edeninde uıyqtaǵan. Asúıde balalar tamaqtanatyn oryndyq, ústel kórinbedi. Polıtsııaǵa ata-analarmen baryp, aryz jazdyq. Ózim prokýratýraǵa, oblystyq sanıtarııalyq-epıdemıologııalyq baqylaý departamentine, oblystyq bilim basqarmasyna da aryz jazyldy, — dedi ata-ana Gúljaına Jýlmaǵanbetova.
Ol ózi sekildi ata-anamen birge Aqtóbe oblystyq bilim salasyndaǵy sapany qamtamasyz etý departamentine de bardy.
Al eki jastaǵy qyzyn osy balabaqshaǵa bergen Ásel Halıdolla birneshe saǵat boıy balasy asúıden shyqpaǵanyn beınebaqylaý kamerasynan kórip, sebebin surady.
— Alǵashynda balabaqsha jaqsy boldy. Biraq 15 qarasha kúni qyzymnyń qabaǵy jaraqattanyp keldi. Beti jylaǵannan keıin isip ketkendeı boldy. Keshke uıyqtar kezde kıimin aýystyryp jatqanda arqasynda eki jaraqat boldy. Tárbıeshisi men dırektoryna telefon shalǵanymmen, habar bolmaı, ata-analardyń ortaq tobyna aıttym. Mende ǵana emes, ózgelerde de sondaı jaǵdaı bolǵan. Kelesi kúni dárigerge apardym, jeńil jaralanǵan dep jazyp berdi. Meńgerýshige kináli adamdy taýyp, jaza qoldanýdy talap ettim. 17 qarasha kúni tańerteń jumystan shyǵarylǵanyn rastaıtyn qujat jiberdi. Sol kúni kamera qaraýǵa bardym. Tańǵy saǵat 7:30-dan bastalǵan vıdeony qarap, qyzymdy tappadym. Onda oıyn bólmesinde ǵana kamera bar. Uıyqtaıtyn jerinde de bolmady. Demek asúıde ǵana bolǵan 5 saǵat boıy. Tárbıeshisinen suraǵanda mardymdy jaýap ala almadym, — dedi Ásel Halıdolla.
Onyń aıtýynsha, sol kezde jumystan shyǵaryldy degen maman qaıta jumysqa qabyldanǵanyn bilgen.
— Oblystyq bilim basqarmasyna «LIANAKZ Amır» JShS jeke balabaqshasynyń ata-analarynan balabaqsha qyzmetkerleriniń óz mindetterin talapqa saı oryndamaýy, atap aıtqanda, balanyń quqyqtaryn óreskel buzý, sanıtarlyq-epıdemıologııalyq talaptar men normalardy saqtamaý boıynsha aryz berildi. Sol kúni bilim basqarmasy Aqtóbe qalasy bilim bólimi qyzmetkerleriniń, «LIANAKZ Amır» JShS jeke balabaqshasy quryltaıshysy jáne meńgerýshisiniń qatysýymen jedel túrde keńes ótkizdi. Jeke balabaqshanyń qyzmetin tekserý jónindegi komıssııa qurylyp, jumys bastaldy. Komıssııanyń tekserý jumysy aıaqtalǵan soń, qorytyndysy boıynsha «LIANAKZ Amır» JShS jekemenshik balabaqshasy qyzmetine qatysty qabyldanǵan sharalar týraly aqparat qosymsha usynylady. «LIANAKZ Amır» JShS jeke menshik balabaqshasy 2019 jyldyń 16 sáýirinen bastap jumys isteıdi. 70 orynǵa memlekettik tapsyrys ornalastyrylǵan, — dep habarlady oblystyq bilim basqarmasy.
Al polıtsııa Qylmystyq kodekstiń «Kámeletke tolmaǵan balany tárbıeleý jónindegi mindetterdi oryndamaý» baby boıynsha sotqa deıingi tekserýdi bastady.
Qylmystyq isti tergeý kezinde ata-analardyń barlyq dáleli tekseriledi.
Posmotret etý pýblıkatsııý v Instagram
