Aqtóbede ata-ana qamqorlyǵynsyz qalǵan balalar jazǵy lagerge barady
AQTÓBE. QazAqparat – Aqtóbede jazǵy lagerdiń qaı ýaqytta iske qosylatyny belgisiz. Alaıda ómirlik qıyn jaǵdaıǵa tap bolǵan balalarǵa arnalǵan ortalyqtyń 35 tárbıelenýshisi kelesi aıda demalys oryndarynda tynyǵady, dep habarlaıdy QazAqparat tilshisi.
Aqtóbelik ata-analar onlaın oqý bastalǵan kezde túrli aryz-shaǵym bolǵanyme bir aptadan soń mashyqtanyp, oqý protsesi bir izge tústi.
«Qashyqtan oqytýdyń nátıjesin qazir aıta almaımyz. Tek jańa oqý jyly bastalǵanda belgili bolady. Eger taqyrypty túsine almasa, tamyz aıynda qosymsha sabaq uıymdastyramyz. Bir qýantarlyǵy, balalar tsıfrly tehnologııany jaqsy meńgergenin kórsetti. 25 mamyr kúni oqý jyly aıaqtalady. Sońǵy qońyraý kúni oblys ákimi balalardy onlaın rejımde quttyqtaıtyn bolady»,- dedi oblystyq bilim basqarmasynyń basshysy Lázzat Orazbaeva.
Al 3-4 maýsymda 11 synyp oqýshylaryna attestat tapsyrylady. Ár synyp úshin 20 mınýt beriledi. Túlekter ara qashyqtyqty saqtap, betperde kıedi. Mektepke tek oqýshynyń ata-anasy kelýi tıis.
«UBT-ǵa daıyndyq bastaldy. Aqtóbe oblysynda 6402 oqýshy mektep bitirse, onyń 5733-i test tapsyrady. Barlyǵy 15 testileý ortalyǵy daıyn. Dezınfektsııalaý jumysy júrgizildi», - dedi Lázzat Orazbaeva.
Aıta keteıik, Aqtóbe qalasynda balabaqsha jumysyn jandandyrý keıinge shegerilgen bolatyn. Eger epıdemıologııalyq jaǵdaı turaqty bolsa, balalardy kezekshi toptarǵa qabyldaıdy.
«Jazǵy lagerdiń jumysyna ázir ruqsat joq. Tek 1 maýsymnan bastap ómirlik qıyn jaǵdaıǵa tap bolǵan balalarǵa arnalǵan ortalyqtyń 35 tárbıelenýshisi demalysqa bara alady», - dedi L.Orazbaeva.
