Aqtóbede asyrandy balalar bilim bólimine kómek surap bardy
Aqtóbe qalasy Qyzyljar aýylynda turatyn Svetlana Mýsına 1996 jyldan beri ata-ananyń qamqorlyǵynsyz qalǵan jetim balalardy baýyryna basyp otyr. Sodan beri 20-ǵa jýyq balany tárbıelep ósirdi. Al qazir onyń qamqorshylyǵynda 14 bala bar. Úsheýi taıaýda Aqtóbe qalalyq bilim bólimine baryp, aryz aıtyp, úıinen qashyp ketken.
«Ótken jyly aǵaly-qaryndasty Arsen men Karınany qamqorlyǵyma alǵan bolatynmyn. Olardy analary tastap ketken. Al Alena burynnan meniń janymda. Aryz aıtatyn kúni olar qoǵamdyq kólikke minip, sabaqtan soń qalalyq bilim bólimine barǵan. Ózim balalardy túsinbeı, kóp qınaldym. Bir ret Arsen úıden ketip qalyp, beıimdeý ortalyǵynda eki aı jatty. Sol kezde psıholog mamandar «bir ret úıinen ketken bala sol qylyǵyn qaıtalaıdy» dep eskertý jasaǵan edi. Mine, taǵy qaıtalanyp, eldiń aldynda uıatty boldym. Arsen sýpermarketten tátti urlap, eki ret ustaldy», - dedi balalardyń asyraýshysy Sveltana Mýsına.
Qazir úıinen qashyp ketken úsh oqýshy Aqtóbe oblystyq kámeletke tolmaǵandardy beıimdeý ortalyǵynda jatyr. Aqtóbe qalalyq bilim bóliminiń sektor meńgerýshisi Aǵyrys Shaǵyrovanyń aıtýynsha, tekserý jumystary júrgiziledi. Mekeme mamandary «anam urdy» degen shaǵymdy da qadaǵalaýǵa alady. Psıhologtar balalarmen sóılesip, otbasyndaǵy jaǵdaıdy anyqtaıdy.
«Asyrap otyrǵan ata-anamyz bizdi urǵan joq. Eger bir nárseni durys istemesek, eskertedi, urysady. Anam da, ákem de jaqsy adamdar. Aı saıyn jalaqy alǵanda qajetti zattar satyp alyp beredi», - dedi Mýsınder otbasynyń tárbıelenýshi Nıkolaı Týchın.
Aıta keteıik, balalardyń otbasyna qaıta oralýy nemese jetimder úıinde qalýy komıssııa sheshiminen soń anyqtalady.