Aqtóbede astyq jınaý naýqany aıaqtalýǵa jaqyn

AQTÓBE. KAZINFORM — Aqtóbe oblysynda egin alqabynyń 95 paıyzǵa jýyǵy oryldy. Ortasha eseppen gektarynan 13,6 tsentner astyq jınaldy.

Aqtóbe oblysynda egin jınaý naýqany birer kúnde aıaqtalady. Qazirde 408,3 myń gektar alqap nemese josparlanǵan kólemniń 94,5% jınaldy. Oblystyq aýyl sharýashylyǵy jáne jer qatynastary basqarmasynyń basshysy Qusaıyn Sársembaıdyń aıtýynsha, dándi daqyldarǵa 432,2 myń gektar jer bólingen. Onyń 408,3 myń gektardan ortasha eseppen 13,6 tsentner astyq jınady. 

Aıta keteıik, óńirde jalpy syıymdylyǵy 685,1 myń tonna bolatyn jeti elevator jumys isteıdi. Qazirgi ýaqytta elevatorlarda 148,4 myń tonna astyq saqtalýly tur. Sondaı-aq taıaýda 123,2 myń tonna daqyl tústi.

— Bizdiń mindetimiz — kúzgi dalalyq naýqandy sátti aıaqtaý. Maıly daqyldardy jınaý bastaldy. Qazirdiń ózinde 8,2 myń gektar alqap jınaldy. Ortasha ónimdiligi gektaryna 9,6 tsentner bolǵan kezde 7,9 myń tonna ónim alyndy. Sondaı-aq, 2,9 myń gektar jerden 49,7 myń tonna kartop, 2,4 myń gektar jerden 43,2 myń tonna kókónis jınaldy. Qolaıly aýa raıy jaǵdaılary men topyraqtaǵy ylǵaldyń ońtaıly mólsheri 2023 jylǵy deńgeıden joǵary ónim alýǵa múmkindik berdi, - dep atap ótti Qusaıyn Sársembaı.

Egin jınaýǵa 1,5 myń traktor, 700-ge jýyq kombaın, 800-ge jýyq traktor tirkemesi jáne 500 júk kóligi jumyldyryldy. Kúzgi dala jumystaryna 7,4 myń tonna dızel otyny bólindi. 

Eske salsaq, Aqtóbe oblysynda 44 kásipkerdiń shyǵyny óteldi. Olardyń 31-i aqshasyn alyp úlgerdi.