Aqtóbede astyq saqtaıtyn qoımalardyń ázirligi tekserilip jatyr

AQTÓBE. KAZINFORM — Bıyl dándi daqyldan 600 myń tonna, maıly daqyldan 55-60 myń tonna ónim alýdy josparlap otyr.

Aqtóbede 585 myń gektarǵa aýyl sharýashylyǵy daqyldary egildi. Onyń 414 myń gektary dándi daqyl, 60 myń gektary maıly daqyl, 104 myń gektary mal azyǵy bolsa, ózgesi baý-baqsha daqyly.

— Egistiń jaǵdaıy jaqsy. Dándi daqyldar boıynsha 75%, maıly daqyldar boıynsha 81% jaqsy deńgeıde. Dándi daqyldar gúldeý, masaqtaný satysynda tur. Kúzgi egin jınaýǵa daıyndyq jasalyp, 6,1 tonna dızel otyny bólindi. Lıtri — 250 teńge. Qazir astyq saqtaý qoımalarynyń tehnıkalyq talaptarǵa sáıkestigi, materıaldyq-tehnıkalyq bazasy tekserilip jatyr. Oblys boıynsha syıymdylyǵy 381 myń tonna bolatyn 7 elevator, sharýashylyqtarda 304 myń tonna bolatyn qoımalar bar. Ónimdi saqtaýǵa tolyq jetedi. Aýa raıyn eskersek, orta eseppen 600 myń tonna dándi daqyl, 55-60 myń tonna maıly daqyl ónimi jınalýy múmkin, — dedi Aqtóbe oblystyq aýyl sharýashylyǵy basqarmasy eginshilik bóliminiń basshysy Nurbek Raıymbaev.

Byltyr 550 myń tonna dándi daqyl, 55 myń tonna maıly daqyl ónimi jınaldy.

Eske salsaq, Aqtóbede 806 myń gektar alqapta kóktemgi dalalyq jumysyn júrgizýdi josparlaǵan edi.