Aqtóbede Astananyń Mádenı kúnderi ótip jatyr
Aımaqtaǵy elorda kúnderin «Astanadan aq tilek» merekelik kontsertimen ashady. Búgin saǵat keshke «Óner ortalyǵy» kontsert zalynda aqtóbelikter úshin «Saryarqa» halyq ánderi ansambli, «Shalqyma» halyq bıi, estradalyq bı, klassıkalyq, estrada jáne halyq vokalynyń solısteri óner kórsetedi.
Shyǵarmashylyq keshtiń shyraıyn elimizdiń eń suranysqa ıe ázilkeshi Tursynbek Qabatov asha túspek. Onymen birge sahnada otandyq estrada juldyzdary da merekeniń jandandyra túsedi. Sahnada Beıbit Qorǵan, Klara Tólenbaeva, Rınat Maltsagov, Qaırat Baekenov jáne «Format» toby, Art-Dombyra jobasy ózderiniń hıt ánderin shyrqaıdy.
Kelesi kúni aqtóbelikter olardy Open air formatynda ótetin keshte taǵy kóre alady. Kól-kósir shattyq pen jarqyn ázilder, non-stop mýzykasy óz qonaqtaryn kútedi. Onda kórermender keshkisin elimizdiń bas qalasynyń 20 jyldyǵyna arnalǵan kontsertte tanymal artısterdi tikeleı sahnadan tamashalaıdy. Ashyq aspan astynda «Fonogrammasy az - áýeni kóp» atty uranmen ótetin kontsertte júrgizýshi tek merekelik atmosferany ǵana emes, jas astananyń qalyptasý joldaryn da eske salyp turady.
Dıskoteka formatynda ótetin kontsert 13 mamyr saǵat 20:00-den 23:00-ge deıin Qazaqstan Respýblıkasy Tuńǵysh Prezıdentiniń ortalyq saıabaǵynda ótedi.
12-13 mamyr kúnderi T. Ahanov atyndaǵy Aqtóbe oblystyq drama teatrynda Q. Qýanyshbaev atyndaǵy Memlekettik akademııalyq qazaq mýzykalyq-drama teatry «Jut» dramasy men «Qyzyl oramaldy shynarym» qoıylymyn usynady. Bashqurt Respýblıkasynyń qoǵam qaıratkeri, rejısser A. Abýshahmanovtyń «Jut» spektaklin dramatýrg O. Janaıdarova astana teatry úshin laıyqtap qoıdy.
Gastrolde taǵy bir Sh. Aıtmatovtyń «Qyzyl oramaldy shynarym» atty shyǵarmanyń jelisi boıynsha teatrdiń kórkemdik jetekshisi Talǵat Temenovtiń spektakli usynylady.
Mádenı baǵdarlamany bas qaladan kelgen qonaqtar Astana qalasynyń Qazaq orkestri memlekettik akademııalyq fılarmonııasynyń «Elordadan elge sálem» atty kontserti tolyqtyra túspek. Atalmysh kontsert 13 mamyr kúni saǵat 17.00-de «Óner ortalyǵynyń» kontsert zalynda bolady. Orkestrmen birge sahnada «Shalqyma» bı ansambli, estrada, halyq jáne klassıkalyq vokaldyń solısteri óner kórsetedi.
Aqtóbedegi gastroldiń eń sheshýshi sáti «Aq tilekpen, Astana!» atty Táýelsizdik saraıy daıyndaǵan ekspozıtsııasy bolmaq. Kórme 12-nen 14 mamyrǵa deıin jumys isteıdi, ony «Óner ortalyǵy» kontsert zalynan tańǵy saǵat 10-nan keshki 20:00-deıin tamashalaýǵa bolady, kirý tegin.
Uıymdastyrýshylar otandyq sýretshilerdiń eń úzdik 100-ge jýyq jumysyn jınady. Kórmede Ómirbek Tileýlıevtiń qazaq halqynyń ótkeni týraly syr shertetin «Elim-aı» serııasyn da usynady.
