Aqtóbede áskerıler dezınfektsııa jumystaryn júrgizip jatyr
AQTÓBE. KAZINFORM – Aqtóbe qalasynda 5 myń gektardan astam jerge zararsyzdandyrý jumysy júrgiziledi. Qazirgi kezde óńirge 16 áskerı tehnıka jetkizildi.
Aqtóbe qalasy Almaty aýdanyndaǵy Maǵadjan jáne Sadovyı turǵyn alaptary men 6 baý-baqsha ujymy aýmaǵyna keshe dezınfektsııa júrgizildi. Búgin bul jumys birneshe baý-baqsha ujymynda jalǵasty. Mindet – sý basqan aýmaqtardy zararsyzdandyrý. Jumys 10 kúnge josparlanǵan.
«Qorǵanys mınıstrligi kómek retinde zararsyzdandyrý jumysyn aqysyz júrgizip jatyr. Barlyǵy 50 áskerı qyzmetshi keldi. Olardyń 16 arnaıy tehnıkasy bar. Sý basqan baý-baqsha ujymdarynyń, turǵyn alaptarynyń aýmaǵyna dezınfektsııa jumysyn júrgizip beredi. Olar 107 aýmaqtaǵy 5 myń gektardan astam aýmaqty qamtıdy», - dedi Aqtóbe qalasy Almaty aýdany ákiminiń orynbasary Darhan Tileýov.
Qaladaǵy zararsyzdandyrý jumystary «Ońtústik» óńirlik qolbasshylyǵy radıatsııalyq, hımııalyq jáne bıologııalyq qorǵaý bólimsheleriniń qyzmetkerlerine júktelgen. Olar dezıstrol eritindisin qoldanyp jatyr.
«Oblysta juqpaly aýrýlardyń taralyp ketpeýi úshin aldyn alý sharasy júrip jatyr. Ol úshin epıdemıologııalyq mańyzy bar obektiler tańdaldy. Zırat mańymen qatar jeke turǵyn úı aýlasyndaǵy kázir sýy jınalatyn qudyq aýmaǵyn zararsyzdandyrý mańyzdy. Sý kóterilgen kezde káriz sý shaıylyp ketti. Bul óz kezeginde ishek aýrýyn týdyrýy múmkin. Sonymen birge Aqtóbe qalasyndaǵy sýmen jabdyqtaý júıesi baqylaýda tur. Sý tasqyny kezinde sý kózderine esh zaqym kelmedi. Áli de monıtorıng júrgizilip jatyr», - dedi Aqtóbe oblystyq sanıtarııalyq-epıdemıologııalyq baqylaý departamenti bóliminiń basshysy Nazıma Serbaeva.
Aıta óteıik, ár tehnıkada 6 tonna arnaıy suıyqtyq bar. Qalaǵa jetkizilgen 16 tehnıka birneshe aýmaqqa bólindi.
