Aqtóbede áskerı qyzmetshi órtten 4 adamdy qutqaryp qaldy
AQTÓBE. QazAqparat - Aqtóbe qalasynda ornalasqan 6655 áskerı bóliminiń efreıtory Rysqalı Eńsepov tútinge tunshyqqan qarııalar men balalardy órtten aman alyp shyqty, dep habarlaıdy QazAqparat tilshisi áskerı bólimniń baspasóz qyzmetine silteme jasap.
Aqtóbe qalasyndaǵy Mahambetov kóshesindegi eki qabatty úıde órt shyqqan. Oqıǵany kórgen efreıtor Rysqalı Eńsepov úıdiń joǵary qabatyndaǵy qarııalar men balalardy dalaǵa alyp shyǵýǵa kómektesken.
«Áskerı qyzmetker jumystan úıine ketip bara jatqanda tútin shyǵyp jatqanyn kóredi. Úı mańyna jınalǵan adamdar páter ishinde múgedek adam men balalardyń qalǵanyn jetkizgen. Sol kezde efreıtor tútinge qaramastan páter ishine kirip, qarııalardy alyp shyqty. Keıin úıde bir jáne bir jarym jastaǵy balanyń qalǵanyn bilip, taǵy joǵary kóterildi. Bárin bir ózi aman alyp shyqty», - dep habarlady 6655 áskerı bóliminiń baspasóz qyzmeti. https://www.instagram.com/p/BhopNO0FIFk/
Aıta keteıik, keshe adamdardyń ómirin qutqaryp qalǵan áskerı qyzmetker búgin turǵyndarmen taǵy da kezdesti. Kelesi aptada efreıtor Rysqalı Eńsepovti marapattaý sharasy ótedi. Sharaǵa QR Ulttyq ulannyń Bas qolbasshylyǵy basqarmasynyń ofıtseri Ǵalymjan Shynazbekov, turǵyndar da shaqyryldy.
