Aqtóbede áskerı qyzmetkerlerden koronavırýs ınfektsııasy tabyldy
AQTÓBE. QazAqparat – Aqtóbede sońǵy táýlikte taǵy 8 adamnan vırýs tabyldy. Olardyń arasynda áskerı qyzmetkerler bar, dep habarlaıdy QazAqparat tilshisi.
Aqtóbe oblysy boıynsha barlyǵy 185 adam indetke shaldyqsa, onyń 55-i emdelip, úıine shyǵaryldy. Oblystyq densaýlyq saqtaý basqarmasynyń basshysy Áset Qalıevtiń aıtýynsha, qalada kópqabatty úılerdiń 51 podezi jabylyp, adamdar úıde karantınde boldy. Olardy qaıta tekserý kezinde taǵy 3 adamnyń indetke shaldyqqany anyqtaldy. Barlyǵy ınfektsııalyq aýrýhanaǵa jatqyzyldy.
«Koronavırýs ınfektsııasymen kúres jumystaryna jumyldyrylǵan eki áskerı qyzmetker de vırýs juqtyrdy. Sonymen birge óńirdegi iri munaı kompanııalary vahtalyq ádispen jumys isteıtin adamdardy josparly túrde tekserýden ótkizip jatyr. Medıtsınalyq tekserý kezinde sol adamdardyń birinen vırýs anyqtaldy. Ol buryn indet juqtyrǵan adammen baılanysta bolǵan eken. Taǵy eki adam naýqastarmen baılanysyp, indetke shaldyqqan. Sońǵy anyqtalǵan 8 adamnyń ekeýi - bala. Biri - 8, ekinshisi - 1 jasta. Naýqastardyń jaǵdaıy birqalypty», - dedi Áset Qalıev.
