Aqtóbede áskerı qyzmetker jaldamaly jumysshysyn óltirip aldy
AQTÓBE. QazAqparat - Aqtóbede T.Begeldınov atyndaǵy Áýe qorǵanysy kúshteri áskerı ınstıtýtynyń júrgizýshisi úıin jóndep júrgen jaldamaly jumysshyny óltirip aldy. Aqtóbe garnızony áskerı sotynda iske qatysty úkim shyqty, dep habarlaıdy QazAqparat tilshisi.
Áýe qorǵanysy kúshteri áskerı ınstıtýtynyń júrgizýshisi Aıan Jármenov ótken jyldyń qazan aıynda jábirlenýshi S.Kıktenkony úı jóndeýge jaldaıdy. Іs materıalyna súıensek, metaldy ydys úshin týǵan daý-janjal kezinde A.Jármenov jumysshyny judyryǵymen birneshe ret uryp, densaýlyǵyna qasaqana aýyr zııan keltirgen. Keıin oqıǵa ornynan ketip qalǵan. Al ishinen aýyr soqqy alǵan jábirlenýshi 2017 jyldyń 27 qazany kúni qaza boldy. Sot-medıtsınalyq saraptama kezinde 54 jastaǵy S.Kıktenkonyń ishine qan ketý, kókbaýyrdyń jyrtylýy saldarynan qaza bolǵany anyqtaldy.
A.Jármenov Qylmystyq kodekstiń «Densaýlyqqa qasaqana aýyr zııan keltirý» baby boıynsha aıyptaldy. Biraq ol taǵylǵan aıyppen kelispedi. Sottalýshy tanysy S.Kıktenkony úıin jóndetý úshin jaldaǵanyn aıtty. Al jóndeý jumystaryn júrgizgen jábirlenýshi kórshisiniń metall ydysyn ruqsatsyz alyp ketpek bolǵan. Urlyq jasamaq bolǵan jumysshyny «jazalaǵan» Jármenov onyń qaza bolǵanyn kórshilerinen estigen.
Aqtóbe garnızony áskerı sotynyń sýdıasy A.Ahmetov densaýlyqqa qasaqana aýyr zııan keltirgen sottalýshy Aıan Jármenovty aıypty dep tanyp, oǵan 8 jylǵa bas bostandyǵynan aıyrý jazasyn taǵaıyndady. Áýe qorǵanysy kúshteri áskerı ınstıtýtynyń júrgizýshisi «serjant» sheninen aıyryldy.
Sot úkimi zańdy kúshine engen joq.
