Aqtóbede áskerı qyzmetshi bodı massaj jasaıtyn áıeldi qorqytyp, tabysynyń jartysyn alyp otyrǵan
AQTÓBE. KAZINFORM — QR Ulttyq Ulany 6655 áskerı bólimi áskerı polıtsııa qyzmetiniń aǵa anyqtaýshysy Temýr Kasymkýlov «Qorqytyp alý» baby boıynsha sottaldy. Ol eki jylǵa bas bostandyǵynan shekteldi.
QR Ulttyq Ulany 6655 áskerı bólimi áskerı polıtsııa qyzmetiniń aǵa anyqtaýshysy Temýr Kasymkýlovqa qatysty is Qylmystyq kodekstiń «Qorqytyp alý» baby boıynsha qaraldy. Іs materıalyna súıensek, Temýr Kasymkýlov 2019 jyly Aqtóbe qalasy polıtsııa basqarmasy Astana aýdany № 1 qalalyq polıtsııa bólimi anyqtaý bólimshesiniń bastyǵy laýazymyna taǵaıyndalǵan.
2022 jylǵy qazanda QR Ulttyq ulan qolbasshylyǵynyń qaramaǵyna jiberilgen. Onda áskerı polıtsııa qyzmetiniń aǵa anyqtaýshysy laýazymyndaǵy taǵaıyndalǵan.
2022 jyly Almaty oblysynyń týmasy Aqtóbe qalasyndaǵy jaldamaly páterlerde massaj jáne bodı massaj qyzmetimen aınalysqan. Ol úsh tanysymen birge klıentterdi qabyldap, massaj, bodı massaj qyzmetterin kórsetken. Sol jyly biriniń ámııany joǵalyp, polıtsııaǵa aryz túsiredi. Qylmystyq is T.Kasymkýlov basqaryp otyrǵan Astana aýdany № 1 QPB-niń anyqtaý bólimshesine beriledi. Tergeý kezinde maıor T.Kasymkýlov bodı massaj qyzmetimen aınalysyp júrgen A.Abdykasymovany polıtsııa bólimine jetkizgen. T.Kasymkýlov sol kezde paıda tabýdy kózdep, jábirlenýshiniń jeke basy jáne jaqyndary týraly málimetterdi zańsyz jınaǵan. Keıin málimetterdi taratyp masqaralaıtynyn nemese jezóksheler esebine tirkep qoıatynyn aıtyp qorqytyp, bodı massaj qyzmetininen túsken paıdanyń bir bóligin berip otyrýǵa kóndirgen.
Tipti sottalýshy T.Kasymkýlov óziniń birneshe tanysyn A.Abdykasymovany kúzetýge bekitken. Olar jalǵa beriletin páterlerge baryp, bodı massaj qabyldaǵan klıentterdiń árqaısysynan túsken qarjynyń tıisti bóligin alyp otyrǵan. Sóıtip birinshi aqshany 2022 jyly shilde aıynda alady. Sol jyly kúzde sottalýshy T.Kasymkýlov qylmystyq áreketteriniń qoǵamǵa qaýipti ekenin uǵynyp, jurt bilip qoıady dep oılap, jábirlenýshi A.Abdykasymovaǵa óz atyna tirkelgen páterin usynǵan. 2022 jyldyń 22 qazanynda T.Kasymkýlov 6655 áskerı bólimi áskerı polıtsııa qyzmetiniń aǵa anyqtaýshysy laýazymyna taǵaıyndalǵanyna qaramastan A.Abdykasymovany qorqytyp, aqsha talap etý qylmystyq áreketterin jalǵastyrǵan. Nátıjesinde 2022 jyldyń 7 shildesi men 2024 jyldyń 4 aqpany aralyǵynda barlyǵy 1 462 500 teńge aqsha alǵan.
Sottalýshy T. E. Kasymkýlov taǵylǵan aıypty moıyndamady. Ol ámııan urlyǵy isinde kýá retinde tirkelgen A.Abdykasymovaǵa «balam aýyryp jatyr» degen soń 200 myń teńge, keıin 130 myń teńge aýdarǵanyn aıtty. Jaldamaly páterde turatynyn aıtqanda óz baspanasyn ýaqytsha bergenin, al óz esepshotyna túsken qarjyny alajaq aqshasy dep túsindirdi.
Sot kabınetindegi materıalǵa súıensek, Temýr Kasymkýlov Qylmystyq kodekstiń 194-baby birinshi bóligimen kináli dep tanylyp, oǵan 2 jyl bas bostandyǵynan shekteý jazasy taǵaıyndaldy. Jábirlenýshi A.Abdykasymovanyń azamattyq talap aryzy ishinara qanaǵattandyrylyp, 1 mln teńge moraldyq zııan óndiriledi. T.Kasymkýlov maıor áskerı ataǵynan aıyryldy. Sot úkimi ázirshe kúshine engen joq, búgin apellıatsııalyq shaǵym tústi.
Eske salsaq, búgin para alǵan eki áskerı qyzmetshi bas bostandyǵynan aıyryldy.