Aqtóbede áskerı ınstıtýt ofıtser-nusqaýshy Batyr Orazymbetovti aqtyq saparǵa shyǵaryp saldy
AQTÓBE. KAZINFORM - T.Bıgeldınov atyndaǵy Áýe qorǵanysy kúshteri áskerı ınstıtýtynda avıatsııalyq eskadrılıasynyń ofıtser-nusqaýshysy Batyr Orazymbetovti aqtyq saparǵa shyǵaryp salý rásimi ótti. Oǵan QR Qorǵanys mınıstriniń orynbasary – Qarýly Kúshteri Áýe qorǵanysy kúshteriniń bas qolbasshysy Dáýren Qosanov pen jeke quram, týǵan-týystary qatysty.
T.Bıgeldınov atyndaǵy Áýe qorǵanysy kúshteri áskerı ınstıtýtynyń jeke quramy sap túzep, ofıtser-nusqaýshysy Batyr Orazymbetovtiń rýhyna qurmet kórsetti. Qaraly mıtıngke qatysqan Qazaqstan Respýblıkasy Qorǵanys mınıstriniń orynbasary — Qarýly Kúshteri Áýe qorǵanysy kúshteriniń bas qolbasshysy Dáýren Qosanov Batyr Orazymbetovtiń qandaı qyzmetker bolǵanyn atap ótti.
— Búgin biz Batyr baýyrymyzdy aqtyq saparǵa shyǵaryp salýǵa qatysyp turmyz. QR Qorǵanys mınıstrligi, Qarýly kúshteri áýe qorǵanysy kúshteriniń jeke quramy otbasyna, týǵan-týystaryna qaıǵyryp kóńil aıtady. Áýege kóterilý qashanda qaýip-qaterli toly sát. Biz óz ómir jolymyzdy, mamandyǵymyzdy ózimiz tańdaımyz. Batyr da osy oqý ornyna túsip, bort ınjeneri mamandyǵyn bitirdi. Ol ómiriniń sońyna deıin aldyna qoıǵan tapsyrmany adal oryndady. Ol Qańtar oqıǵasynda, sý tasqyny kezde qaltqysyz qyzmet etti. Ony osyndaı qalpynda este saqtap, qurmet kórsetemiz, — dedi QR Qorǵanys mınıstriniń orynbasary Dáýren Qosanov.
Qaraly mıtıngke Aqtóbe oblysy ákiminiń orynbasary Joldas Batyrhan da qatysty.
— Aıaýly uldaryńyz, janashyr dostaryńyzdyń ómirden ótýine baılanysty oblystyq ákimdiktiń atynan qaıǵyryp kóńil aıtamyz. Batyr óz atyna saı azamat boldy. El basyna kún týǵan shaqta myńdaǵan adamnyń ómirine arasha boldy. Sý tasqyny kezinde qutqarý jumystaryna qatysty. Batyrdy biz osyndaı qalpynda jadymyzda saqtaımyz. Ol ómiriniń 500 saǵatyn áýede ótkizdi. Eldiń qorǵany bolǵan, qaýipsizdikke jaýap bergen azamatymyzdy shyǵaryp salyp turyp, baqul bol degimiz keledi. El aspany ashyq bolsyn, — dedi Aqtóbe oblysy ákiminiń orynbasary Joldas Batyrhan.
Aıta keteıik, Batyr Orazymbetov 1988 jyly týǵan. 2009 jyly Áýe qorǵanysy kúshteri áskerı ınstıtýtyn «ushaqtar, tikushaqtar jáne avıatsııalyq qozǵaltqyshtar» mamandyǵy boıynsha bitirgen.
Ol Áýe qorǵanysy kúshteri áskerı ınstıtýty avıatsııalyq eskadrılıasynyń ofıtser-nusqaýshysy qyzmetin atqardy.
— Qoldaý kórsetip, demeý bolǵandaryńyz úshin raqmet. Batyrmen birge oqyp, qyzmet etip, ony tanydyńyzdar. Árdaıym este saqtańyzdar. Ol ashyq, janashyr. Baýyrlaryna da kómektesip júrdi, — dedi qaraly mıtıngte aǵasy Qanat Orazymbetov
Eske salsaq, 9 qarasha kúni Mártók aýdany Saryjar aýylynda tikushaq apatqa ushyryp, janyp ketti. Bortta úsh adam bolǵan. Onyń bireýi oqıǵa ornynda kóz jumdy.
Eki naýqasty kúıik shalyp, jaraqat aldy. Olar Aqtóbe oblystyq kópsalaly aýrýhanada em qabyldap jatyr.
