Aqtóbede áskerge shaqyrylatyn jastarǵa patrıottyq fılmder kórsetilip jatyr
AQTÓBE.QazAqparat - Aqtóbede áskerge shaqyrylatyn jastarǵa patrıottyq fılmder kórsetilip jatyr. Sebebi, ótken jyly oblystyq qorǵanys isteri jónindegi departamenti onnan astam jasty dinı ustanymdary úshin ásker qataryna jibermegen bolatyn, dep habarlaıdy QazAqparat tilshisi.
Aqtóbe qalalyq qorǵanys isteri jónindegi basqarmasy 2000 jyly týǵan azamattardy áskerge daıyndap jatyr. Aldymen olardyń densaýlyǵy tekseriledi. Qazirgi ýaqytta jastardyń arasynda kóz aýrýy birinshi orynda tur.
«Qazirgi kúni shaqyrý ýchaskesine tirkeý jumystary júrip jatyr. Maqsaty 2000 jyly týylǵan jasóspirimderdiń sanyn bilý, medıtsınalyq komıssııadan ótkizip, áskerı qyzmetke daıyndaý. Ásker qataryna shaqyrylatyndar arasynda dinı kózqaras ustanýshylar bar, biraq kóp emes. Túsindirý jumystary júrgiziledi. Sebebi, Otan aldyndaǵy azamattyq boryshyn óteıtinder namaz oqı almaıdy. Shaqyrylǵandarǵa ulttyq rýh, senim, patrıottyq tárbıe berý úshin fılmder kórsetip jatyrmyz», - dedi Aqtóbe qalalyq qorǵanys isteri jónindegi basqarmanyń bólimshe bastyǵy Ernur Áshirbekov.
Aıta keteıik, qazir jastardyń arasynda kóz aýrýy men tirek qımyly aýrýy, ıaǵnı, omyrtqanyń qısaıyp ketý derti asqynyp tur. Bıyl qala boıynsha 2 myńnan astam jasty tirkeý qajet bolsa, qańtar aıynan bastap olardyń teń jartysy medıtsınalyq tekserýden ótip boldy.
