Aqtóbede áskerge shaqyrylýshy komıssarıatta qarsylyq kórsetkeni úshin jazalandy
AQTÓBE. KAZINFORM – Aqtóbelik áskerı komıssarıatta medıtsınalyq tekserýden óteýden bas tartty. Sol kezde áskerıler polıtsııa shaqyryp, arty daýǵa ulasty.
Áleýmettik jelide polıtsııa men er adam arasynda tartys týyp, áıeldiń jan ushyra aıqaılaǵany, balasyn jiberýin ótingeni jaıly vıdeo tarady. Artynsha jigitterdi ustap, áskerge jiberip jatqany jaıly aıtyldy. Al oblystyq PD baspasóz qyzmeti aqparattyń órbý jolyn túsindirdi.
— Polıtsııa qyzmetkerleri janjal bolǵan jerge shaqyrý túsken soń bardy. Áskerı komıssarıatqa jetkizilgen azamat medıtsınalyq komıssııadan ótýden bas tartqan. Osyǵan baılanysty áskerı komıssarıat ókili men áskerge shaqyrylýshy arasynda janjal týyndaǵan. Sonymen qatar áskerge shaqyrylýshy polıtsııa qyzmetkerlerine baǵynbady. Osy fakti boıynsha materıal jınalyp, protsessýaldyq sheshim qabyldaý úshin áskerı-tergeý basqarmasyna jiberildi. Áskerge shaqyrylýshyǵa qatysty QR ÁQBtK-niń 667-baby, ıaǵnı, polıtsııa qyzmetkerleriniń zańdy talaptaryna baǵynbaýy boıynsha ákimshilik hattama toltyryldy, — dep habarlady oblystyq PD baspasóz qyzmeti.
Eske salsaq, BQO-da shekarada qyzmetine salǵyrt qaraǵan áskerı qyzmetshi qamaýǵa alyndy.