Aqtóbede ashyq turǵan qudyqqa qulaǵan sábı mert boldy

AQTÓBE. QazAqparat – Aqtóbede órt sóndirýshilerdiń gıdranty bar qudyq qaqpaǵy ashyq qalyp, sábı qulap ketti. Sábıge birneshe ota jasalǵanymen, birneshe kúnnen keıin kóz jumdy, dep habarlaıdy QazAqparat tilshisi.

Oqıǵa 9 sáýir kúni bolǵan. Qudyqqa qulaǵan 1 jas 5 aılyq sábıdi ata-anasy aýrýhanaǵa jetkizgen.

«Ata-anasynyń sózine súıensek, bala tereńdigi 3,5 metr bolatyn qudyqqa qulap ketken. Aýrýhanaǵa jetkizilgende jaǵdaıy óte aýyr boldy. Birden jansaqtaý bólimine jatqyzylyp, alǵashqy medıtsınalyq kómek kórsetildi. Bir saǵat ishinde konsılıým otyrysy ótti. Oǵan hırýrg, reanımatologtarmen qatar neırohırýrg, kardıohırýrgter qatysty. Ómirin saqtap qalý úshin keńirdegi men keńirdek tamyry, qursaq qýysy, ókpeqap qýysyna birneshe ota jasaldy. Alaıda sábı 12 sáýir kúni tynys alýyn toqtatty», - dep habarlady oblystyq densaýlyq saqtaý basqarmasynyń baspasóz qyzmeti.

Oblystyq PD baspasóz qyzmetiniń habarlaýynsha, ata-anasy sol kúni aýla mańyn jınaýǵa shyqqan. Sol kezde janynda júrgen sábı ashyq qalǵan qudyqqa túsip ketken.

«Qazirgi kezde oqıǵa boıynsha tergeý júrip jatyr, is qozǵaldy. Saraptama taǵaıyndaldy. Іs qysqartylýy múmkin», - dedi oblystyq PD baspasóz qyzmetiniń jetekshisi Erbolat Sarqulov.