Aqtóbede ashylǵan Heriot-Watt ýnıversıtetiniń fılıalynda 300 stýdent oqyp júr
Qasym-Jomart Toqaev Heriot-Watt ýnıversıtetiniń Aqtóbe qalasyndaǵy fılıalyn aralap kórdi, dep habarlaıdy Kazinform Aqordaǵa silteme jasap.
Aqtóbe oblysyna jumys sapary aıasynda Prezıdent joǵary oqý ornynyń bilim berý jáne ǵylymı-zertteý jumystarymen tanysty.
Bilim ordasynda elimizdiń 9 óńirinen kelgen 300 stýdent oqyp jatyr. Onyń 35 paıyzy — aýyl mektepteriniń túlegi, al 42 paıyzy — áleýmettik jaǵdaıy tómen sanattaǵy otbasy balalary.
Bul fılıal Memleket basshysynyń joǵary bilim berý júıesin qaıta qurý jónindegi tapsyrmasyn oryndaý maqsatynda Qudaıbergen Jubanov atyndaǵy Aqtóbe óńirlik ýnıversıtetiniń bazasynda ashylǵan.
Prezıdentke berilgen málimetke sáıkes elektr energetıkasy, munaı ınjenerııasy jáne energetıkalyq menedjment, kompıýterlik ınjenerııa mamandyqtary boıynsha kadr daıarlaý isi aǵylshyn tilinde júrgiziledi.
Memleket basshysyna stýdentterdiń Heriot Watt ýnıversıtetiniń Malaızııadaǵy, Birikken Arab Ámirlikterindegi, Shotlandııadaǵy fılıaldarynda bilimin jalǵastyrý múmkindigi bar ekeni jóninde málimet berildi.
Fılıal túlekteri Heriot-Watt University men Qudaıbergen Jubanov atyndaǵy Aqtóbe óńirlik ýnıversıtetiniń dıplomyn birge alady.
Ǵylymı jetistikterge arnalǵan kórmeni aralaý barysynda Prezıdentke joǵary oqý orny ǵalymdarynyń jaratylystaný, tehnıkalyq jáne gýmanıtarlyq ǵylymdar salasyndaǵy ázirlemeleri tanystyryldy.
