Aqtóbede arzandatylǵan dızel otynyn bólý kezinde baqylaý kúsheıedi
Oblys ákiminiń orynbasary Mavr Abdýllınniń janar-jaǵarmaımen qamtamasyz etý máselelerine qatysty jıyn ótkizdi.
Oǵan Aqtóbe oblysy boıynsha ekonomıkalyq tergeý departamenti, tabıǵı monopolııalardy retteý departamentiniń basshylary, iri janarmaı quıý stantsııalarynyń ókilderi qatysty.
«12 sáýirden bastap janar-jaǵarmaı men dızel otynynyń shekti bólshek baǵasy kóteriledi. Aldaǵy ýaqytta jasandy tapshylyq jasaýǵa nemese alypsatarlyqpen aınalysýǵa eshkimniń quqyǵy joq. Biz qandaı da bir zańsyz áreketter bolmas almas úshin turaqty negizde monıtorıng júrgizemiz. Bul másele - oblys ákiminiń jeke baqylaýynda», - dep atap ótti Mavr Abdýllın.
Elimizdiń keıbir óńirinde janar-jaǵarmaı tapshylyǵy tirkeldi. Sondyqtan Aqtóbede qordaǵy munaı ótininiń jalpy kólemi anyqtaldy.
«Kásipkerler 12 sáýirden bastap alǵan jańa taýardy ǵana ózge baǵamen sata alady. Al buǵan deıin alynǵan munaı óniminiń baǵasyn kótere almaıdy. Qazir óńirde 14,5 myń tonna AI-92 bar. Bul kólem 30 kúnge jetedi. Qolda bar 9 200 tonna dızel otyny 14 kúnge jetedi. Baǵa jóninde sóz baılasý derekteri anyqtalǵan jaǵdaıda ákimshilik jaýapqa tartylady», - dep eskertti Aqtóbe oblysynyń kásipkerlik basqarmasynyń basshysy Nurhan Tileýmuratov.
Aqtóbe oblysy boıynsha ekonomıkalyq tergeý departamentiniń ókilderi kóktemgi dala jumystaryn júrgizýge Energetıka mınıstrligi 9,8 myń tonna arzandatylǵan dızel otynyn bólgenin málimdedi.
Aqtóbelik fermerlerden egis jumystaryna 562 ótinim kelip túsken, 280 tonna ıgerildi.
Ekonomıkalyq tergeý departamenti oblys ákimdigimen birlesip, arzandatylǵan dızel otynyn tıimdi bólý jumysyn qadaǵalaıdy.
