Aqtóbede arzan taýar alamyn dep aldanyp qalǵandar kóp
AQTÓBE. QazAqparat -Aqtóbelikter ınternet arqyly arzan taýar satyp almaq bolyp, aqshany belgisiz jaqqa aýdaryp jatyr. Polıtsııa qyzmetkerleri ońaı oljaǵa kenelmek bolǵan turǵyndardyń qarjysy Reseı asyp, AQSh-qa jetkenin aıtty, dep habarlaıdy QazAqparat tilshisi.
Aqtóbede áleýmettik jeli arqyly tapsyrys berip, taýarsyz, aqshasyz qalyp jatqandar bar. Olar aldanǵanyn kesh bilip, polıtsııaǵa habar beredi. Biraq shetel asyp ketken qarjyny keri qaıtarý múmkin emes.
«Internet arqyly arzan taýar alýǵa qulshynysy bar adamdar aldanyp jatyr. Eger ınternet arqyly tapsyrys bergińiz kelse, aldymen ol dúken týraly jan-jaqty aqparat jınap alǵan jón. Aram oıly adam kez kelgen áleýmettik jelini paıdalanyp, habarlama qaldyrýy múmkin. Tipti, adamdarǵa jaqsy tanys áleýmettik jelini paıdalanady. Birinshiden, arzan taýar usynady. Ekinshiden, Qazaqstanda tez arada tabylmaıtyn taýar satamyz dep aldaıdy ári onyń baǵasy naryqtaǵy qunynan tómen. Úshinshiden, bank qyzmetkerimiz dep telefon shalyp, shotyńyzǵa hakerler shabýyl jasaǵanyn habarlaıdy. Sol kezde jeke málimetterdi surap alady. Qupııa málimetterdi bilip alǵan soń aqsha birden shetelge aýdarylyp jatyr»,- dedi Aqtóbe oblystyq ІІD bastyǵynyń orynbasary Ernat Qalıaqparov.
Qarjy shekara, tipti muhıt asyp jatyr. Kórshi Reseıge, AQSh-qa aýdarylǵan derekter tirkeldi.
«Kóbine AQSh, Reseıge ketip jatyr. Sonymen qatar, álemniń kez kelgen túkpirine aqsha aýdarylǵan. Páter, kólik satyp alatyndar da aldanady. Satýshy shetelde júrgenin aıtyp, sýretterin jiberýge ýáde beredi. Páter unaǵan soń aqshany aýdaryp jiberedi. Adamdardy saq bolýǵa, ınternet arqyly taýar satyp alý kezinde jan-jaqty aqparat jınaýǵa shaqyramyz. Óıtkeni, Qazaqstanda joq taýardy shetelden tez ákelý múmkin emes»,- dedi E.Qalıaqparov.
