Aqtóbede áriptesin óltirip alǵan kenshi 13 jylǵa bas bostandyǵynan aıyryldy

Aqtóbe oblystyq qylmystyq ister jónindegi mamandandyrylǵan aýdanaralyq sotynda adam ólimine qatysty is qaraldy. Oqıǵa bıyl mamyr aıynda Hromtaý qalasynda boldy.

Aıyptaý aktisine súıensek, 2 mamyr kúni sottalýshy eńbek demalysyna shyǵyp, sony atap ótpek bolady. Bir jerden shyǵyp, ekinshi dámhanaǵa barǵan kezde úsh kenshi ishimdikke tapsyrys beredi. Keıin jábirlenýshi men sottalýshy ózara janjandasyp, tatýlasady. Arada birshama ýaqyt ótkende qaıta arazdasyp qalady. Sol sátte sottalýshy dámhananyń ashanasyna kirip, pyshaqty ala shyqqan.

- Dámhanadaǵy ydys jýatyn bólmeden uzyndyǵy 196 mm bolatyn aǵash sapty qońyr tústi as úı pyshaǵyn oń qolyna alyp, shalbarynyń qaltasyna salady. Adam óltirýge degen qasaqana oıy týyndap, qarýlanyp shyqqan. 3 mamyrǵa qaraǵan túni saǵat 01:23-te ózine qaraı jábirlenýshiniń kele jatqanyn kórgen kezde pyshaqpen sol jaq moınynan bir ret, sol jaq keýde qýysynan 4 ret soqqy jasaǵan. Saldarynan jábirlenýshi jerge qulaǵan. Al sottalýshy tepkilep, sol jerdegi shynyny qolyna alyp, betinen uryp, oqıǵa ornynan boı tasalaǵan. Sot-medıtsınalyq qorytyndyǵa sáıkes jábirlenýshi jedel qan ketýden qaza bolǵan. Jaraqaty tereńdigi 12 sm deıin, - dedi sotta memlekettik aıyptaýshy Baýyrjan Qalı. 

Sot otyrysy kezinde sottalýshy ózine taǵylǵan aıypty moıyndaǵanymen, qoryqqanyn, pyshaqty qorǵaný úshin qolyna ustaǵanyn aıtty.

Jábirlenýshi tarap bolsa keshirim bermedi jáne qylmystyq isti qaıta saralaýdy surady.

- Sotqa deıingi tergeý jumystary kezinde is 464 betten turdy. Al sotta is beti 772 bet boldy. Men onymen tolyq tanyspadym. Meniń quqyǵym buzyldy dep eseptep, shaǵym túsirdim. Biraq sot ony qarastyrmady. Sonymen birge sotqa tek bir kýá shaqyryldy. Sol kúni qyzmet kórsetken daıashy sot otyrysyna shaqyrylmady. Sot otyrysynda beınematerıal kórsetildi. Kólemin úlkeıtip qarap, inimniń eshqandaı da qaýip tóndirmegenin dáleldegim keldi. Ótinishimizdi qaraýsyz qaldyrdy, sýdıa eshqaısysyn elemedi. Men ári qaraı apellıatsııalyq shaǵym túsiremin. Qylmystyq kodekstiń 99-baby 1-bóliginen 99-baby 2-bóligimen qaıta saralaýdy da suradym, - dedi jábirlenýshi Baǵlan Jarqynbaıuly.

Onyń aıtýynsha, sottalýshynyń ata-anasy betpe-bet otyryp keshirim suramaǵan, tek telefon arqyly habarlasqan.

Aıta keteıik, sotta bes jábirlenýshi boldy. Ol marqum kenshiniń eki balasy men áıeli, anasy men týǵan baýyry. Jábirlenýshiler 100 mln teńge moraldyq zııandy óteýdi surady. Sot anasy men baýyrynyń árqaısysyna 7 mln teńge, al otbasyna jalpy 10 mln teńge óndirdi.

Aqtóbe oblysynyń qylmystyq ister jónindegi mamandandyrylǵan aýdanaralyq sotynyń baspasóz qyzmetiniń habarlaýynsha, sotta memlekettik aıyptaýshy 11 jyl bas bostandyǵynan aıyrý jazasyn taǵaıyndaýdy surady.

Sot úkimimen sottalýshy Qylmystyq kodekstiń 99-baby 1-bóligimen kináli dep tanylyp, oǵan 13 jyl merzimge bas bostandyǵynan aıyrý jazasy taǵaıyndaldy. Sot úkimi zańdy kúshine engen joq.

Eske salsaq, Aqtóbede jol apaty kezinde úsh kenshi qaza tapty.