Aqtóbede arnaıy kólikterdi qurastyrý zaýyty salynady
AQTÓBE. QazAqparat - Aqtóbede arnaıy kólikterdi qurastyrý zaýyty salynady. Qazirgi ýaqytta munda júk kólikterine arnalǵan tirkemeler qurastyrylyp jatyr, dep habarlaıdy QazAqparat tilshisi.
Ótken jyly Aqtóbede júk kólikteriniń tirkemesin shyǵaratyn zaýyt iske qosylǵan bolatyn. Sodan beri iri óndiris oryndary qajetti júk kólikteriniń tirkemesin Reseıden emes, Aqtóbeden tasymaldap jatyr. Jylyna 250 tirkeme shyǵaratyn óndiris orny jańa zaýyt iske qosylǵan kezde jylyna 500 dana tirkeme daıyndaı alady. Bul arqyly ishki suranysty tolyq óteýge múmkindik bar.
«Bir jylda 200-ge jýyq tirkeme jasaldy. Shıkizat Reseıden tasymaldanyp jatyr. Barlyǵy 170 mıllıon teńgege Túrkııa, Iran, Eýropadan ákelindi. Jańa zaýyt iske qosylǵan kezde janar jaǵarmaı, gaz, tsement tasıtyn tsısternalar jasalady. Jańa jobanyń qujattaryn daıyndap, «Damý» qor tapsyrǵan edik. «Damý óndiris» baǵyty boıynsha nesıe alý josparda bar. Bizge janar jaǵarmaı tasıtyn kólikti qurastyrýǵa arnalǵan qural-jabdyq kerek»,- dedi «PP Tehnodom ST-KZ» JShS dırektorynyń orynbasary Erlan Ábdiǵaparov. Jańa zaýyt 2018 jyldyń sońynda iske qosylady.
«Aktobe Invest - 2017» forýmyna qatysýshylar kólik dóńgelekterinen jasandy jabyndy daıyndaıtyn óndiris ornynyń jumysymen tanysty. Ystyq pen sýyqqa tózimdi jabyndy balalardyń oıyn alańyna, tennıs kortyna, júrigý jolyna, baspaldaqtarǵa yńǵaıly. Jylyna 70 myń sharshy metr jabyndy daıyndaýǵa múmkindigi bar zaýyt Óskemen, Almaty, Astana, Petropavl, Oral, Aqtaý qalasyna tapsyryspen ónimdi jetkizip jatyr. Óndiris orny jylyna 5 myń tonna qaldyqty óńdeıdi.
«Aqtóbe qalasy mańynda shashylyp jatqan kólik dóńgelekterin jınap, ekologııalyq ahýaldyń jaqsarýyna septigimizdi tıgizip kelemiz. Zaýyt «Aqtóbe» ındýstrııaldyq aımaǵynda ornalasqan. Munda jol, jaryq, sý jetkilgen. Temir jol da bar. Kommýnaldyq tólemderi arzan. Qazir bizde 40 adam jumys isteıdi. Joba quny - 500 mıllıon teńge»,- dedi «TalanTchology» JShS bas dırektory Vasılov Lagızov. Zaýyt dóńgelekten qalǵan rezeńkeden jasandy jabyndy daıyndaıdy. Metaldy arnaıy oryndarǵa tapsyryp, dóńgelek ishinen shyqqan jipti jınap jatyr. Aldaǵy ýaqytta jipten júrginshiler jolyna arnalǵan taqtaıshalar daıyndalady. Qaldyqsyz óndiris orny qazirgi kúni 17 myń sharshy metir jabyndy shyǵarylyp jatyr. Keler jyly óndiris orny tolyq qýattylyqta jumys isteıdi.
Aıta keteıik, forým aıasynda aýyl sharýashylyǵy qurylymdary men memlekettik-jeke menshik seriktestik aıasynda salynǵan áleýmettik nysandar tanystyryldy. Forým kezinde quny 200 mıllıard teńge bolatyn 11 memorandýmǵa qol qoıylady. Aqtóbe men Qostanaı oblystary aımaqaralyq yntymaqtastyq pen ónerkásiptik kooperatsııasyn birlese damytýǵa ýaǵdalasady. Sonymen qatar, forým aıasynda jel generatoryn shyǵaratyn zaýyt salý, farmatsevtıkalyq óndiristiń aýmaǵyn keńeıtý qurylysy, tehnıkalyq selıtra men karbamıd, ıaǵnı, tyńaıtqysh shyǵarý zaýytynyń qurylysyn júrgizý kelisimi jasalady. Munaı-gaz jabdyqtaryn shyǵarý klasterin qurý, qus fabrıkasyn, jylyjaı, nan kombınatyn salý memorandýmdaryna qol qoıylady.
