Aqtóbede árip tanymaǵan balany uryp-soqqan tárbıeshige úkim shyqty
AQTÓBE. QazAqparat - Aqtóbede sabaq bilmegen balany urǵan tárbıeshi sottaldy, dep habarlaıdy QazAqparat tilshisi.
Aqtóbe oblysy, Qarǵaly aýdanyndaǵy «Aıgólek» balabaqshasynyń tárbıeshisi sabaq bilmeı, árip tanymaı turǵan balanyń basynan nuqyp, urdy. Bul vıdeo áleýmettik jeli arqyly tarap, qylmystyq is qozǵalǵan bolatyn.
«Aqtóbe oblystyq kámelet jasqa tolmaǵandar jónindegi aýdanaralyq sotynda tárbıeshige qatysty qylmystyq is qaraldy. Qylmystyq kodekstiń «Kámeletke tolmaǵan adamdy tárbıeleý jónindegi mindetterdi oryndamaý» baby boıynsha úkim shyqty. Іs materıaldaryna súıensek, 2018 jyldyń 15 qarasha kúni «Aıgólek» balabaqshasynda álipbı úıretip jatqan tárbıeshi 2013 jyly týǵan oqýshyny urdy. Sot otyrysy kezinde sottalýshy barlyq kináni moıyndap, keshirim surady», - dep habarlady oblystyq sottyń baspasóz qyzmeti.
Aıta keteıik, sot úkimimen tárbıeshi 120 saǵat qoǵamdyq jumysqa tartylyp, 3 jylǵa pedagogıkalyq qyzmet atqarý quqyǵynan aıyryldy.
Sot úkimi kúshine engen joq.
